Patay ang usa ka drayber sa motorsiklo human nidasmag sa poste sa dalan Tres de Abril sa Barangay Punta Princesa, dakbayan sa Sugbo niadtong Dominggo sa buntag, Hulyo 30, 2023.
Giila ang biktima nga si Jefferson Caduyac, 19, lumad nga taga Probinsiya sa Bohol apan kasamtangan nagpuyo sa Pacaña Compound sa silingang barangay sa Tisa.
Sa wa pa mahitabo ang insidente pasado alas 3:00 sa kaadlawon, nag-inom si Caduyac uban sa mga higala sa Colon area.
Matod sa usa sa iyang mga higala nga si John Barry Atim, ang motorsiklo gipanag-iya sa iyang amahan.
Laing higala nga si Isagani Llera nitug-an sa Superbalita Cebu nga una niyang gihangyo si Caduyac nga ihatod siya sa Tisa aron makakuha og dugang kuwarta aron makapadayon sila sa pag-inom.
Matod niya, nag-helmet silang duha.
Sa pagkagabii, ang iyang mga higala niingon nga kalit nga mibiya si Caduyac dala ang yawe sa motorsiklo. Wala silay ideya kon asa siya paingon.
Sa ulahi lang nila nahibaw-an nga lagmit misulay siya sa pagpauli.
Wa mag-helmet si Caduyac dihang nahitabo ang aksidente.