Duha ka mga lalaki ang gipamusil-patay sa riding in tandem sa managlahing mga dapit sa Sugbo sa Huwebes, Mayo 11, 2023.
CEBU CITY
Namatay ang 64 anyos nga lalaki human pusila sa wala pa mailhing riding in tandem sa Sityo Kamparang, Brgy. Kalunasan, siyudad sa Sugbo, pasado alas 5:00 sa buntag.
Si Police Staff Sergeant Rey Anthony Montalban sa Guadalupe Police Station sa Cebu City Police Office (CCPO), niila sa biktima nga si Diliciano Jacaban, molupyo sa dapit.
Matod ni Montalban, si Jacaban sayo sa buntag nipaingon sa iyang tindahan daplin sa dan aron mangabli atol sa hitabo.
Sumala sa nakasaksi sa pagpamusil, ang gunman nag-angkas sa usa ka motorsiklo nga daling nisibat sa wala matino nga direksiyon human sa pagpusil.
Ang biktima dunay samad sa liog ug lawas hinungdan nga gidala sa tambalanan apan namatay.
Tulo ka mga kabhang sa mga bala ang narekober sa crime scene sa mga sakop sa Scene of Crime Operation (Soco).
Atol ning pagsuwat, wala pay kasayuran sa motibo sa pagpusil sa biktima sanglit ang mga anak niini nagkanayon nga way kontra ang ilang amahan.
SIBONGA
Mag-uuma namatay human gi-ambush sa riding in tandem sa alas 9 sa buntag sa Sitio Mantatong, Brgy. Mangyan, lungsod sa Sibonga.
Ang biktima giilang si Dalmacio Caballes, Jr., 56, dunay kapuyo, taga Purok 5, Brgy. Mangyan.
Sa imbestigasyon ni Police Senior Master Sgt. Michelle Ponce, ang biktima nagsakay sa iyang motorsiklo gikan sa Sitio Mantatong, Brgy. Mangyan padulong sa Brgy. Libo, Sibonga.
Ang mga killer nagpasalipod sa kasagbutan daplin sa karsada, kalit nilang gipusil sa makadaghan ang biktima hinungdan sa hinanaling kamatayon niini. (BBT / GPL)