DUHA ang patay sa managlahing mga pagpamusil sa Martes sa hapon, Enero 7, 2019 sa Dakbayan sa Sugbo.
Ang duha ka mga krimen naggintang lang og kapin sa usa ka oras.
Wa pa mahibaw-i sa kapulisan ang mga motibo sa duha ka mga krimen.
Usa sa mga biktima habalhabal driver nga gipusil sa gunman nga nagmotorsiklo sa sityo Corssing, Barangay Basak San Nicolas.
Si Police Master Sgt. Nicolo Gonzales niila sa biktima nga si Arnold Albano, 34, taga sityo Kalubihan.
Matod ni Gonzales nga sa ilang inisyal nga imbestigasyon, si Albano namilit og mga pahibawo sa mga bong-bong kalabot sa mga ngalan sa bag-ong mga opisyal sa ilang kahugpongan sa mga habalhabal drayber.
Wa magdugay, usa ka lalake niduol kang Albano ang gunman dayon nipusil kaniya.
Si Albano naigo sa ulo ug lawas nga niresulta sa iyang kamatayon.
Dugang ni Gonzales nga sa ilang nakita, posibleng personal grudge ang motibo sa pagpatay.
Nasayran usab nila nga si Albano dunay gibadlong nga mga drayber nga namasero nga di sa ilang rota.
Ila pa hinuon kining sutaon kon unsa ka tinuod.
Ang mga organisasyon sa habalhabal dunay ilang tagsa ka parkinganan diin sila maghuwat og mga pasahero ug estrikto kini nilang gipatuman.
Paglabay og usa ka oras kapin, lain na usab ang gipusil patay. Usa ka tindero og masi ang gipatay sa may Sityo All Season, Barangay Cogon Pardo.
Si Police Corporal Demus Tordeos niila sa biktima nga si Arniel Salandron, 31, taga Sityo Back Central, Barangay Basak Pardo.
Giingong nag binugtong ang gunman. Wa pa silay nasayrang motibo. (BBT, FMG - USJR Masscom intern)