Duha ka mga sakop sa Alpha Kappa Rho (Akrho) fraternity ang nangalandig sa tambalanan human gipang-atake ug gipangdunggab sa kapin o kulang 20 ka batan-ong mga lalaki nga giingong mga sakop sa Bloods gang.
Sa interview sa Superbalita Cebu sa imbestigador sa kapulisan sa Siyudad sa Bogo nga si Police Corporal Junrey Olivar, matod niya nga ang insedente nahitabo alas 11 sa gabii sa Sabado, Oktubre 7, 2023 sa Purok Labayan, Brgy. Nailon sa maong Siyudad.
Ang dapit nagsaulog sa kapistahan.
Ang mga biktima giila nga sila si Angelo Tero, 26, ulitawo ug si Timothy, 16, managsilingan sa Purok Labayan.
Matod ni Olivar nga ang mga biktima nigawas sa diskohan nga gipahigayon alang sa piyesta sa ilang baryo aron mamauli na.
Matod pa nga samtang ang duha naglakaw, sila gisundan sa gibana-banang 20 ka mga sakop sa Bloods gang apan walay bisan usa nga nailhan ang mga biktima.
Nahitabo ang paregla ug usa sa mga lalaki nidunggab kang Timothy, kinsa naigo sa dughan samtang ang laing usa nidunggab kang Tero sa buko-buko.
Dali nga nanibat ang mga suspek human madunggabi ang duha ka mga biktima.
Gipangdala ang mga biktima sa tambalanan.
Padayon pang nag-imbestigar ang kapulisan sa hitabo aron pag-ila sa mga suspek.