GIAWHAG sa mga awtoridad ang mga ginikanan nga kanunay bantayan ang ilang mga anak labina kon nagpuyo duol sa sapa human duha ka mga bata nangalumos samtang nangaligo sa Butuanon River sa habig sa Mandaue City niadtong Miyerkules, Agusto 3, 2022.
Giila ni Police Staff Sergeant Lemar Pontillas sa Station 3 sa MCPO ang mga biktima nga sila si Same Calderon, 6, ug Alexander Calderon, 7, pulos mga taga Barangay Paknaan, Mandaue City.
Matod ni Pontillas nga base sa ilang imbestigasyon, ang duha, kauban ang laing bata, nangaligo sa sapa, duol sa Zone Ahos, nga wa mananghid sa mga ginikanan.
Wa usay hamtong sa duol atol sa pagpangaligo.
Samtang sila nanglangoy, ang menor nga ila ra usab nga kabanay nakabantay nga wa na nakatunga sila si Same ug Alexander gikan sa ilawom.
Busa dali nga ni report ang bata ngadto sa iyang iyaan.
Dali usab nga gitaho ang insidente ngadto sa mga awtoridad nga nakapahigayon dayon og search and rescue.
Human nabangalan, dali nga gipangdala ang mga bata sa Mandaue City Hospital, diin gisuwayan sila sa pag-revive, apan napakyas.
Matod ni Pontillas nga nag-request na sila og autopsy sa Regional Forensic Unit-Central Visayas sa duha ka mga bata aron mahibaw-an kon unsa ang nahitabo. (HIC/REV)