GIGUBA sa Cebu City Government ang duha ka ilegal nga estruktura nga nagtungtong sa agianan sa tubig sa sityo Ubos Pundok sa Barangay Basak Pardo nga gitumbok sa mga residente nga hinungdan sa lunop sa dapit sa higayon nga mobundak ang kusog nga uwan.
Si Konsehal Jerry Guardo, chairman sa Committee on Infrastructure, maoy gitahasan ni Mayor Edgardo Labella para mahatagan og alibyo ang dugay nang problema sa baha sa maong sityo.
Ang balay nga gitumbok ni Guardo gipanag-iya ni Jenny Cuestas kinsa maoy nakasunod sa maong balay sud 10 na ka tuig ang nakalabay diin ang habig sa ilang comfort room nipatong sa agianan sa tubig.
Si Guardo maoy nakig-alayon kang Cuestas ug nisugot usab kini nga i-demolish ang ubos nga bahin sa parte sa iyang balay para makaagi ang tubig panahon sa baha.
Giangkon sa tagbalay nga nakabara kini sa baha dapit hinungdan sa lunop apan, dili siya makatangtang sa kongketo nga sanglit walay tawo nga motrabaho niini.
Busa kauban ang Pevention, Restoration Order Beautification Enhancement (Probe) ug Department of Engineering and Public Works (DEPW) mao ang niguba sa duha ka kongkreto nga estruktura diin ang baha makaagas hinungdan sa pag-overflow.
“Kuhaon gyud na nato ang parte sa balay kay kon manglimpyo lang ta mobara gihapon ang tubig. ang engineering maoy mopalawom sa drainage ug ang Probe maoy mobakbak sa semento para mabalik ang orihinal nga drainage nato diri,” padayag ni Guardo.
Ang mga tag-iya sa maong balay wala hinuoy pagbabag sa gihimong operasyon sa siyudad.
“Dugay na gyud kaayo ni, nanagko nalang mi ba mao gyud ni ang among problema karon kay kon mag-uwan unya paingon mi sa trabaho ang tubig moabot sa taga liog or hawak ang tubig ug dili mi kagawas,” matod sa usa ka residente.
Kapin o kulang 500 metros gikan sa balay ni Cuestas, adunay laing kongkretong gitukod sa agianan sa tubig kansang balay gipanag-iya ni Edwin Fernandez.
Ang mga residente sa sityo nagtuo nga human sa pagguba sa duha ka estruktura, dili na mobaha sa da dapit lapas sa hawak. (PAC)