Duha ka gikatahapang mga ‘hitman’ sa mga durugista sa Sugbo nasikop sa managlahing mga operasyon sa kapulisan sa dakbayan sa Sugbo ug Talisay.
CEBU CITY
Nasikop sa kapulisan ang suspetsadong hitman nga nalambigit sa mga kaso sa pagpamusil sa dakbayan sa Sugbo ug Talisay atol sa buy-bust sa alas 2:10 sa kaadlawon sa Biyernes, Septiyembre 15, 2023, sa Sitio Doña Pepang, Barangay Tejero, dakbayan sa Sugbo.
Ang suspek giila nga si Phillip Justine Ruiz, 19, taga Sitio Zapanta, Villagonzalo 1, Barangay Tejero, dakbayan sa Sugbo.
Nakuha sa kapulisan gikan kaniya ang mga pinakete sa gituohang shabu nga motimbang og 20 gramos nga dunay standard drug price nga P136,000.
Nalakip si Ruiz sa listahan sa kapulisan nga high value individual sa pagpayuhot sa ilegal nga drugas.
Gawas sa ilegal nga drugas nakakuha usab ang kapulisan og usa ka .38 nga revolver nga loaded sa tulo ka mga bala ug usa ka hand grenade.
Matod ni Police Major Efren dela Cruz Diaz Jr., hepe sa Waterfront Police Station, nga si Ruiz nalambigit na sa mga kaso sa pagpamusil sa dakbayan sa Sugbo.
Siya maoy suspek sa pagpamusil sa Barangay Tejero niadtong Hulyo 30, 2023 ug sa Septiyembre 3, 2023 sa Sitio Silangan 1, Barangay Tinago.
Dugang ni Diaz, nakakuha usab sila og impormasyon nga naabot sa Talisay si Ruiz sa pagpamusil bugti sa suhol.
TALISAY CITY
Giila sa kapulisan nga hitman sa usa ka drug personality ug dunay duha ka mga kasong murder nadakpan sa Comelec checkpoint samtang nagdala og armas sa Sitio Ranger, Barangay Biasong, dakbayan sa Talisay, alas 11:30 sa gabii sa Huwebes, Septiyembre 14, 2023.
Ang suspek giilang si Crispin Cañada Guba, hingkod, taga Dumlog, Talisay City
Matod ni Police Lieutenant Colonel Wayne Magbanua, hepe sa Talisay City Police Station, nga samtang nagpahigayon sa checkpoint ang iyang mga personnel, miagi ang suspek sakay sa usa ka motorsiklo, apan sa pagsusi sa kapulisan, aduna kini dala nga KG9 submachine pistol nga dunay duha ka mga magazine ug 27 ka mga bala niini ug duha ka kalibre .45 nga pistola ug duha ka mga magazine.
Dugang ni Magbanua nga ang suspek nailhan nga hitman sa mga drug personality sa Talisay ug nadakpan na usab sa kaso sa ilegal nga drugas ug wanted sa duha ka mga kasong murder sa korte.