ORMOC CITY- Duha ka mga kawani sa Leyte Provincial Capitol gibanhigan sa Bypass Road sa Zone 4, Barangay 110 Utap, dakbayan sa Tacloban kagahapon, Disyembre 14, alas 9:00 sa buntag. Usa ang napatay.
Nakabsan sa kinabuhi si Gil Bobaris, 60, samtang samdan ang iyang sakay nga si Victorio Pineda, 51, mga kawani sa Kapitolyo ug pulos taga San Ricardo, Babatngon, Leyte. Si Bobaris maoy nagmaneho sa sakyanan nga Toyota Innova nga kolor gray ug dunay plaka nga ZDU 426 nga natusaktusak sa mga bala sa armas.
Sa pasiuna nga imbestigasyon sa kapulisan, ang duha gikan sa amihanang bahin sa Abucay sa Tacloban.
Pag-abot sa Maharlika Highway, upat ka mga lalake nga sakay sa duha ka mga motorsiklo ang mirapido sa sakyanan.
Nakanaog pa si Bobaris apan napatay gihapon sa mga gunmen. Samtang si Pineda nakadagan ug nakatago sa duol nga balay. Dali nga nisibat gikan sa lugar ang mga killer paingon sa Barangay 110 Utap sa samang dakbayan.
Ang kapulisan nihimo sa pagkakaron og dugang pakisusi sa pag-ila sa mga mamumuno ug pagsuta sa motibo sa krimen.