Duha ka mga menor de edad ang gipangdakop sa mga awtoridad human sila nasakpan sa akto nga nihimo og bandalismo sa dakbayan sa Lapu-Lapu sa Huwebes, Abril 20, 2023.
Si Lapu-Lapu City Mayor Junard “Ahong” Chan niingon nga gi-turn over sila sa City Social Welfare and Development Office (CSWDO) alang sa pagpahinumdom sa maong kalapasan.
Ang mga indibidwal nga makahimo og vandalism ug uban pang mga buhat sa malicious mischief nga makaguba sa “clean and green” nga proyekto sa Siyudad kinahanglan nga mobayad og hangtod sa P5,000 isip mga silot ug mahimong mapriso.
Ubos sa Ordinansa 16-055-2022 nga gipangamahanan ni Konsehal Linda Susan Baring ug giaprobahan sa Sangguniang Panlungsod niadtong Nobiyembre 2022, ang mga makalapas momulta og P3,000 sa unang paglapas; P4,000 sa ikaduhang paglapas; ug P5,000 sa ikatulo nga paglapas ug pagkabilanggo depende sa hukom sa korte.
Gawas pa niana, ang mga makalapas kinahanglan usab nga limpiyohan ang ilang paghugawhugaw ug ibalik ang naguba nga kabtangan sa orihinal nga kahimtang niini.
Si Chan niingon nga kini subay sa paningkamot sa City Government sa pagpanindot sa kadalanan gamit ang mural paintings uban sa koordinasyon sa Mactan Artist Guild aron madani ang lokal ug langyaw nga mga turista.
“Daan na natong gipahimangno nga dili gyud ko kauyon sa mga nagpaluyo sa mga vandalism sa atong syudad kay isip usa ka tourist destination, gipaningkamotan gayud nato nga manindot tan-awon sa mga mata sa turista sa atong lugar,” matod niya.
Sa Sabado, Abril 22, si Chan niingon nga mohatag siya og cash reward nga mokabat sa P20,000 niadtong moila ug makahatag og impormasyon sa mga indibidwal nga mihimo og vandalism sa siyudad, kansang mga hulagway i-post sa iyang social media post.
Niadtong Pebrero, ang mayor niingon nga andam siyang mohatag og P10,000 gikan sa iyang kaugalingong pocket money ngadto ni bisan kinsa nga makahatag og impormasyon sa mga indibidwal nga makaguba sa mga pampublikong paril ug koral, ug P30,000 sa bisan kinsa nga makadakop sa mga malapason.
Iyang gipasaligan sila nga itago ang ilang pagkatawo.
Gihatagan og gibug-aton sa mayor ang kamahinungdanon sa pagsumpo sa bandalismo, ilabi na nga ang dakbayan adunay daghang umaabot nga mga proyekto karong tuiga, sama sa Mactan North Reclamation Development Project, pagtukod sa ikaupat nga taytayan sa Mactan, skyway project nga maghatag og solusyon sa problema sa trapiko sa dakbayan, ingon man ang socialized housing sa Barangay Canjulao.
Matod pa ni Chan nga sigurado siya nga ang maong mga proyekto makadani sa mga negusyante nga mamuhunan sa siyudad, diin kadaghanan sa mga Oponganon makabenepisyo. (MKG)