USA ka semana kapin sukad gitulis ug gipatay ang magtiayong Baringui-an sa Barangay Panadataran, lungsod sa San Fernando, natuman sa kapulisan ang ilang saad nga sulbaron gilayon ang krimen.
Apan, ang mga suspek puro ra sab diay mga pulis, duha kanila ningtahan sa nagkadaiyang mga buhatan sa kapulisan sa Sugbo pipila ka mga adlaw ang nakalabay.
Unang nitahan giilang si Police Staff Sergeant Junrey Papa Ypil, 36, sakop sa Danao Police Station, taga Barangay Canamucan, lungsod sa Compostela.
Si Ypil ningtahan ngadto kang Police Colonel Glenn Mayam, hepe sa Regional Intelligence Division (RID) ug Police Lt. Colonel Roderick Gonzales, hepe sa Provincial Intelligence Unit (PIU) sa alas 3 sa hapon sa Pebrero 20, 2022.
Si Ypil giingong niangkon sa iyang partisipasyon sa pagpatay sa magtiayong Baringui-an niadtong Pebrero 13 sa gabii sa ilang balay sa Panadtaran.
Kasamtangan nga gikustodiya sa buhatan sa PIU si Ypil.
LAING MITAHAN
Sunod nga nitahan sa samang adlaw mao si Police Staff Sergeant Junrey Gillana Batobalunos, 42.
Si Batobalunos niadto sa buhatan sa iyang hepe sa City Intelligence Unit (CIU) sa Lapu-Lapu City Police Office (LCPO) nga si Lieutenant Colonel Jul Muhammad Leones Jamiri mga alas 10:30 sa gabii sa samang adlaw.
Gi-turn over sab ni Batobalunos ang KG9 submachine pistol nga adunay duha ka mga magazine ug 18 ka mga bala.
Human sa iyang boluntaryong pagtahan, gitanggong gilayon siya sa prisohan.
Inisyal nga impormasyon sa LCPO, wa moluwat og pamahayag si Batobalunos kon aduna ba siyay kalambigitan sa pagpatay sa magtiayong Baringui-an.
Gisuwayan sa Sunstar Cebu ug Superbalita Cebu sa pagkuha og habig ni Police Col. Engelbert Soriano, hepe sa Cebu Police Provincial Office (CPPO), apan wa motubag sa tawag sa mobile phone.
WA MAGTUO
Nakurat ang anak nga babaye sa magtiayong Baringui-an nga si Samantha nga mga pulis ra usab ang mga suspek sa brutal nga pagpatay sa iyang mga ginikanan nga sila si Peter ug Ma. Louela.
Matod ni Samantha nga wala siya magdahom nga mga pulis ang nagpatay sa iyang mga ginikanan. Iyang gihulagway ang mga pulis nga unta mga tigpanalipod sa kinabuhi sa katawhan.
Iyang gidugang nga human sila makabasa sa balita sa social media, nisamot ang kasakit sa iyang dughan kay mga pulis ang naghimo sa krimen.
“Actually, Sir, kahibawo man ta nga ang police, peacemaker. Wala mi ga expect nga naa diay ingon ana nga pulis. Pero pagkahibawo gyud nako nga police diay ang usa sa mga suspect, bawo lang, nibukal ang akong dugo,” tipik sa pamahayag ni Samantha.
Ang magtiayong Baringui-an gitakdang ilubong karong hapon, Pebrero 23, 2022.
WA UNA MOTUBAG
Usa sa mga opisyal sa Police Regional Office 7 nga gisuwayan unta sa pagkuha sa habig niini apan wala motubag sa tawag sa telepono sa mga sakop sa media.
Apan giingong ipasaka una nila ang kaso karong adlawa batok sa mga pulis nga nalambigit sa krimen una moatubang sa mga sakop sa media ang mga imbestigador.
Nagdumili usab sa pagtubag ang hepe sa Lapu-lapu City police, Colonel Arnel Banzon, human maapil ang usa sa iyang personnel sa CIU sanglit nagpadayon pa ang imbestigasyon sa Police Regional Office 7.
Niadtong Pebrero 13 sa gabii, samtang diha sa nataran sa ilang balay sila si Peter ug Ma. Louela, kauban sa ilang mga anak ug ubang mga sakop sa pamilya, lima ka mga lalake nga sakay sa usa ka Nissan Navara nangabot.
Ang lima nga pulos nagtaptap sa mga nawong ningpaila nga mga militar. Gipasulod sa balay ang tanan gawas lang sa magtiayong Baringui-an, apan si Samantha nigawas kay mogakos pa unta sa iyang mga ginikanan hinungdan nga nakasaksi siya sa pagpatay.
Gidala sa lima ang wa pa mahibaw-ing kantidad sa mga alahas ug cash.