2 ka senior citizens nadakpan sa tigbakayan human hinay midagan

KON wala pay arthritis ang manag-agaw nga lolo, hayan di sila masikop sa tigbakayan niadtong Sabado Hulyo 18, sa alas 2:15 sa hapon sa Brgy. Tominjao, lungsod sa Daanbantayan.

Si Elpidio Rossel, 64, minyo ug ig-agaw nga si Ricardo Rossel Gastador, 67, minyo na-corner diretso sa mga pulis nga mironda sa tigbakayan.

Ang mga dinakpan pulos beneficiary sa Special Amelioration Program sa gobiyerno.

Si Police Staff Sgt. Ramon Catubig sa Daanbantayan Police Station nga nahinabi sa Superbalita Cebu nagkanayon nga ang manag-agaw’ng dinakpan uban sa laing silingan nga mga sugarol nagtigbakay.

Dunay nakahatag og impormasyon sa kapulisan hinungdan nga gironda ug nagkatibuwag sa pagpanagan.

Apan ang manag-agaw nga dinakpan nasurprisa ug wala nakasibat ug napusasan diin nakuha sa ilang possession ang duha ka manok igtatari nga dunay mga buwang ug ang pusta nga P150 pesos.

“Paglingi nila Sir pulis naman wala na modagan kay hinay naman ilang mga tuhod, sakit na daw kay arthritis mao nilingkod nalang sila, napusasan,” dugang ni Catubig.

Matod ni Catubig, nga dunay lima ka mga sugarol nga at large nga kauban sa mga dinakpan ang giapil nila sa pagpasakag kasong kalapasan Presidential Declaration 1602 o illegal gambling sa cockfighting.

Gibutyag niini nga dugay na gireklamo sa mga residente sa lugar ang maong tigbakayan nga nagpadayon bisan kon pandemic. (GPL)