Duha ka mga suspek sa pagpatay kang Rhea Mae Tocmo nga silang Simeon Gabutero ug Roberto Gabison gipangkuhaan na og DNA samples sa PNP Forensic Unit 7 alang sa himuon nga testing aron pagtino kon duna ba silay partisipasyon sa krimen taliwa sa hugot nga pagpanghimakak sa duha.
Ang positibong DNA testing magpalig-on sa kaso nga gipasaka batok kanila.
Matod ni Police Lt. Col. Gerard Ace Pelare, spokesperson ni Police Brig. Gen. Anthony Aberin, hepe sa PRO 7, nga itandi ang swab samples sa duha sa nakuha usab sa forensic personnel gikan sa lawas ni Rhea Mae.
Ang positibong resulta niining DNA test maoy usa sa magmatuod nga sila ang ningpatay sa 19 anyos nga biktima gumikan kay dili man ikapanghimakak ang scientific nga ebidensya.
Silang Gabison ug Gabutan pulos nanghimakak nga duna silay kalabutan sa pagpatay kang Rhea Mae nga gilabay sa sitio Mohon, Brgy. Tisa, dakbayan sa Sugbo nga gisulod sa karton.
“Ang forensics man gud would confirm katong mga pieces of evidence nga nakuha na sa una, ang scientific evidence is beyond question. Once proven nga naa kay DNA didto sa crime scene its very difficult to refute,” matod ni Pelare.
Si Simeon Gabutan, sa interview sa sibyaanang DyHP, andam nga mopaubos sa polygraph test pagmatuod nga wala siya mamakak nga ang nihatag sa cellular phone nga iya ni Rhea Mae mao si Gabison.
Apan si Gabison nanghimakak nga gikan kaniya ang cellphone ni Rhea Mae ug iyang gipabaligya kang Gabutan.
Siya nanghimakak nga nakaila siya kang Gabutan.
Si Gabutan, sa iyang bahin, niangkon nga siya ang naa sa hulagway nga unang gipublikar sa Cebu City Police Office (CCPO) base sa CCTV footage sa iyang pagbaligya sa cellphone ni Rhea Mae pipila ka mga adlaw human gipatay ang dalaga.