Drugas ang usa sa gitan-aw nga nag-unang motibo sa pagpusil patay sa wa pa matinong gidaghanon sa mga tawo sa duha ka mga lalake sulod usa ka balay sa Sityo Palwa Maria, Barangay Inayawan, Dakbayan sa Sugbo sa Lunes sa alas 3 sa kaadlawon, Nobiyembre 15, 2021.
Balay diin nahitabo ang krimen giingong bisan kinsa lang ang mosulod hinungdan nga nagduda ang mga pulis nga gihimo kining drug den.
Ang mga biktima giila sa mga silingan nga silang Danilo Licaros Casiño, 38, kinsa nag-abang sa balay apan lumad nga taga Misamis Oriental ug Jonas Bayno 35, nagpuyo ra sa Inayawan.
Matod ni Police Major Jose Angelo Acupinpin, hepe sa Pardo police station, nga alas 6 na sila sa buntag nakadawat og tawag gikan sa barangay nga adunay gipusil sa maong dapit.
Dali sila nga nanawag og mga personnel sa Scene of the Crime Operations (Soco) aron ma susi ang mga lawas nila ni Casiño uyg Bayno.
Ang lawas ni Bayno diha sa may hagdanan sa silong samtang si Casiño sa taas sa balay.
Si Casiño dunay mga samad sa mata ug gusok samtang si Bayno sa liog.
Matod ni Police Corporal Benjie Maglahos nga hayan kalibre .45 nga pistola ang gigamit sa pagpusil.
"Wala may maka determine kon pila ka suspek, usa ba o duha kay walay naka kita buto hinoon sa armas maoy ilang nadunggan," matod ni Maglahos.
Ang kapulisan nakakuha og mga basiyo lakip na sa slug ug buhing bala nga wala pa matino ang kalibre sa pagkutlo ning balita.
Usa sa mga silingan ang mitug-an nga mga pasado alas 3 sa kaadlawon naka dungog siyag buto-buto sa armas apan wala siya mogawas tungod sa kahadlok.
Gituohan nga kaila ra sa mga biktima ang killer tungod kay wala man pugsa sa pag-abli ang pultahan sa ilang balay nga mao karon ang ilang gisubay.
"Ingon sa atoang investigator nga walay sign sa forced entry. Possible its either magkaila sila ug gipasulod," matod ni Acupinpin.
Si Maglahos nga nahinabi sa Superbalita Cebu niingon nga aduna silay nakuha nga mga gamit sa pagsuyop sa illegal nga drugas sa sulod sa balay.
Sigun sa mga silingan nga daghan ang manulod sa balay tungod kay gituohan gihimo na kining drug den.
Giingong nalambigit na sa illegal nga drugas ang mga biktima nga usa sa ilang gisubay kon may kalambigitan ba sa ilang kamatayon.
Si Police Lieutenant Colonel Wilbert Parilla, deputy city director for operations sa Cebu City Police Office, nimando sa hepe sa Pardo police station nga palawman pa ang ilang imbestigasyon ug susihon ang back ground sa duha ka biktima.
"Ang atoang directive sa chief of police nga make it sure nga masulbad ni considering nga this is the thrust of our new regional director, to reduce all occurrence of crime. But if ever dili gyud nato ma prevent ang crime nga mahitabo, we have to make it sure nga it will be solved," matod ni Parilla.
Giawhag usab sa kapulisan ang mga saksi nga mokooperar sa imbestigasyon karon sa kapulisan alang sa kasulbaran sa maong krimen.
