CALBAYOG CITY, Samar -- Duha ang patay lakip ang usa ka menor de edad human gi-ambush sa P1, Barangay Mawacat, Oquendo District, dakbayan sa Calbayog, alas 7 Biyernes sa gabie, Marso 1.
Giila ang biktima nga si Michael Angelo Mendoza Jr. alyas Palos, 35; ug si alyas Otoy, menor de edad, pulos taga East Awang, dakbayan sa Calbayog.
Base sa inisyal nga imbestigasyon, sakay sa usa ka green nga Toyota Fortuner ang namusil sa duha ka biktima.
Ang duha ka biktima nagsakay og motorsiklo paingon unta sa Oquendo Poblacion.
Pag abot sa nahisgutang lugar gipamusil ang mga biktima ug namatay diha-diha dayun.
Dugang sa imbestigasyon nga giatangan sa mga responsable ang duha ka biktima nga mo agi sa maong dapit.
Wala na mahibaw-i diin paingon ang mga responsable human sa insidente.
Pag abot sa kapulisan ilang nakita ang duha ka patayng lawas nga nagbuy-od na sa kalsada.
Si Mendoza nag sul-ob pa og bullet proof vest apan wa kini magsilbi gumikan kay gamay ra nga parte sa lawas ang natabonan.
Narekober gikan kang Mendoza ang usa ka dakong pakete sa gituhoang shabu, usa ka magazine sa kalibre .45, unom ka bala sa samang kalibre, drug pharaphernalia, cellphone, ug mga importanteng dokumento.
Nakuha usab ang kwarta nga nagkantidad og P20,140.
Narekober usab sa kapulisan sa crime scene ang 17 ka catridges sa kalibre 5.56 mm ug 12 ka cartridges sa kalibre .45.
Si Police Lieutenant Colonel Joie Pacito Yape, hepe sa Calbayog Police Station, nibutyag nga usa ka high-value target (HVT) si Mendoza.
Dugang ni Yape nga nigawas usab sa ilang imbestigasyon nga usa ka gun-for- hire si Mendoza kinsa daghan og kaso nga giatubang.
“HVT gyod to siya and at the same time alleged gun-for-hire sab to siya. Naa to operasyon didto sa Manila ug tan-awon ang file ato sa NBI (National Bureau of Investigation) daghan na to kaso,” matod ni Yape.
Usa sa gitutokan sa kapulisan ang angulong may kalabutan sa ilegal nga drugas, diin posibleng gipapatay si Mendoza sa iyang ka kompitensya.
Matod ni Yape, susihon nila kung kinsang grupo ang nipatumba kang Mendoza.
Samtang susihon usab nila ang mga dokumento nga narekober kang Mendoza basin mahatagan sila og lead sa posibleng nibuhat sa krimen.