Duha ang namatay human nahulog sa taytayan ang ilang gisakyan nga motorsiklo sa nasudnong dalan nga nagsumpay sa Barangay Basak ug Canhangdon Occidental sa lungsod sa Loon sa Probinsiya sa Bohol.
Sumala sa kapulisan sa Loon, alas 5:30 sa buntag sa Sabado, Mayo 14, nasayod sila sa hitabo dihang nakadawat og tawag kalabot na sa natagak nga motorsiklo sa maong taytayan.
Si Police Master Sergeant Jason Amonsot, chief investigator sa Loon Police Station, niila sa duha ka mga namatay nga sila si Archer Tanduyan Diaz, 45, ug taga Purok 2 sa Barangay Katipunan, lungsod sa Sagbayan Probinsiya, Bohol ug si Joel Almadores, 23, ug molupyo sa Metro Manila.
Si Amadores napalgan sa pagka alas 9:30 sa buntag sa samang adlaw.
Sa imbestigasyon nga gihimo sa Loon Police, nasayran nga si Diaz maoy nagmaneho sa motorsiklo ug angkas niya si Almadores gikan namista sa Barangay Pondol, Loon.
Matod pa, paingon unta sa lungsod sa Cortes ang duha human manarbaho isip construction workers.
“Duha daw ni sila ka motorsiklo nagnilumbaanay paingon sa Cortes, among nasayran nga usa ka Ramil daw (nagmaneho sa laing motorsiklo) ang kalumba aning duha unya pulos na mga hubog. Si Ramil natingala nalang nga wala na kasunod daw sa iyaha kining si Archer (Diaz),” matod ni Amonsot.
Si Amadores napalgan na ang lawas sa alas 9:30 sa buntag nga milutaw sa dagat.
Dugang ni Amonsot nga si Diaz nakit-an pasado sa alas 6:00 na sa buntag nga naka-helmet pa kini ug naka-jacket.
“Unya amo lang pud iklaro nga dili tinuod nga si Amadores gitambog sa dagat ug dunay daghan mga samad kay mao man gud ang nikatap nga estorya nga gipangtabi,” dugang ni Amonsot, bahin sa hugonhugon sa istorya.
Ang motorsiklo ni Diaz nadiskobrehan usab nianang adlawan na sa susamang adlaw.