Nitapos ang Fire Prevention Month kagahapon, Marso 31, uban sa pag-ulbo sa sunog sa 14E Villa Teresita St., Barangay Sambag 1, siyudad sa Sugbo, ika-20 nga sunog sa dakbayan sa buwan sa Marso.
Nadawat sa Cebu City Fire Office (CCFO) ang alarma sa alas 11:35 sa buntag sa sunog sa usa ka three-storey building nga gipanag-iya ni Teresita To Chip.
Matod ni FO2 Fulbert Navarro, duty fire investigator sa CCFO nga nahinabi sa mga tigbalita, ang kayo nagsugod sa usa ka lawak sa unang andana nga giabangan sa usa ka Mary Sedaya.
Gibutyag ni Navarro nga gibana-bana nga kapin sa P900,000 ang danyos sa sunog.
Sa inisyal nga pakisusi, electrical overload uban sa kainit sa panahon maoy hinungdan sa pagsilaub sa kayo, matod ni Navarro.
Samtang si SFO2 Wendell Villanueva, tigpamaba sa CCFO, nibutyag nga sulod sa Marso, ang kinatibuk-ang danyos sa sunog niabot og dili mominos P53 milyunes. / BBT, GPL