Bisan gibasura ang dul-an sa 2,000 ka mga kaso nga nag-ung-ong sukad pa niadtong 2007, ang Commission on Elections (Comelec) padayong nag-atubang og halos susamang gidaghanon sa backlog cases sa ilang buhatan.
Sa usa ka televised public briefing, si Comelec Chairman George Garcia niingon nga ang backlog sa mga kaso nagpabiling dul-an sa 2,000 base sa ilang labing ulahing pag-ihap.
“Our current case backlog is more than 2,000,” butyag ni Garcia.
“These 2,000 cases are not just election offense cases, but also disqualification cases and protest cases, all of which have been directly filed at the Comelec,” dason nihya.
Si Garcia niingon nga ang mga nag-ung-ong nga mga kaso naglakip usab sa mga may kalabutan sa gisumite nga Statement of Contributions and Expenditures sa 2013 ug 2016 polls.
Ang hepe sa piniliay miingon nga samtang gusto nila nga mapadali ang resolusyon sa tanan nga mga kaso, gusto nila nga masiguro nga kini makasugakod sa pagsusi.
“The Comelec decides cases based on the facts as presented and the law as applicable to it. When you read our decisions, it can stand the test of all scrutiny,” ingon ni Garcia.
Sayo ning semanaha, ang Comelec en banc nipagawas og resolusyon nga nagbasura sa dul-an sa 2,000 ka mga kaso sa election offense nga napasaka gikan niadtong 2007 hangtod 2013.
Kon gipangutana kon adunay bisan unsang mga apela nga gisang-at kalabot sa mga bag-o lang na-dismiss nga mga kaso, si Garcia miingon nga hangtod karon wala pa. (HDT / SunStar Philippines)