GIDAYEG ni Mayor Tomas Osmeña ang Philippine Drug Enforcement Agency (PDEA 7) sa ilang kalampusan batok sa ginadiling drugas parikular sa pagkasakmit sa P20 milyones nga shabu sa dakbayan sa Talisay.
Matod pa ni Osmeña nga aduna lay 30 ka personnel ang PDEA 7 apan ang ilang kalampusan ug pakiggubat sa illegal drugs daw gilangkuban ang ilang buhatan og 300 ka tawo.
“This did not happen in Cebu City, but still I would like to commend PDEA for doing a good job.” matod ni Osmeña labot sa labing uwahi nga operasyon sa PDEA 7.
Si Director Yogi Ruiz, sa PDEA Central Visayas, nihangop sa pagdayeg sa amahan sa siyudad sa Sugbo uban sa pagpasalamat sa dakong tabang sa City Government sa ilang kampanya.
“Lipay kaayo ang PDEA considering nga gidayeg ta unya si Mayor Tom pa ang nidayeg nato unya dako sab og natampo ang iyang support labi na ang paghatag og sakyanan ngadto sa atong personnel,” matod ni Ruiz.
Gipadayag sa director nga wa pa sila mahuman sa ilang misyon ug di sila mohunong sa ilang trabaho hangtod nga aduna pay mga tawo nga padayon nga nagnegusyo og shabu ug ubang matang sa ginadiling drugas.
“Magpadayon ang atong programa pinaagi sa paggukod aning mga high value target. Padayon lang unta ang pagsalig sa community sa PDEA despite sa gamay ra nato nga personnel ug ang support sa community when it comes to information ug sa pagsalig sa atoa nga ma-accomplish nato ang atong misyon,” dugang ni Ruiz.
Niadtong Biyernes, nasikop sa PDEA si Marwin Abelgas uban sa laing lima niya ka konsabo kinsa maoy giilang lider sa Abelgas Drug Group sa Cebu sa Deca Homes Subdivison sa Talisay City.
Si Abelgas ang giingong nipuli kang anhing Jeffrey "Jaguar" Diaz human mamatay sa miaging tuig.
Apan si Abelgas nanghimakak nga siya dako nga drug player sa Sugbo.
Si Osmeña nagkanayon nga dihang gisuspenso sa Philippine National Police ang ilang operasyon batok sa illegal drugs, ang PDEA maoy gisandigan sa mayor aron mapadayon ang iyang gubat batok sa drugas.