BINULTONG drugas nga giputos sa condom ug gipasok sa kinatawo nakuha gikan sa duha ka ginang sa Mandaue City Jail niadtong Huwebes sa hapon.
Unang nasikop sa jail guard mao si Agapita Morre, 51, minyo, residente sa Bonifacio Ext., Brgy. Poblacion, dakbayan sa Danao.
Nasikop mga alas 2:20 sa hapon si Morre human may nakitang daw gapas nga nisiwil sa iyang kinatawo sa dihang gipaubos og strip search sa dihang nibisita sa city jail.
Mismong si Jail Officer 1 Lyrra Bandoquillo maoy nakakita sa nisiwil maong iyang gipakuha sa suspek.
Nisupak pa ang suspek apan nakombinser kini human gitawag si JO2 Blanche B Aliño, admin clerk ug JO1 Abigail Joy Tarona ug JO2 Arthur Endrina, duty searcher.
Daling gidakop ang suspek human makuha ang bulto sa drugas nga nakuha gikan kaniya.
Nasuta ning mantalaan nga inahan ang suspek sa usa ka Gary Jayme Morre nga nasikop tungod sa pagpangarnap.
Mga 30 minutos ang nilabay, laing ginang na usab ang nasikop ni Bandoquillo.
Giputos sa condom ug surgical tape ang drugas nga gisud ni Marilou Pepito, 48, minyo, lumolupyo sa Brgy. Mantuyong, Mandaue.
Giingong si Pepito igsuon ni Alex Pepito nga napriso tungod sa drugas.
Matod ni JO2 Blanche Aliño nga ila pang gitino ang kantidad sa bulto sa drugas gikan sa duha ka ginang kinsa pasakaan og kasong paghupot ug ginadiling drugas. (JPP)