MOKABAT sa 30 ka mga sako sa basura ang nakuha gikan sa ilawom sa kadagatan sa Barangay Maribago, dakbayan sa Lapu-Lapu atol sa gipahigayon nga ika-32 nga International Coastal Cleanup Day sa Maribago Bluewater kagahapon sa buntag.
Mga botelya sa bino, beer ug uban pang mga ilimnong makahubog, inubanan sa mga botelya sa soft drinks ug mga plastik ang nakuha sa kapin 136 ka mga scuba diver nga niboluntaryo og salmot sa Scubasurero 2017 nga nanukad sa maong resort.
Nagduda si Andy Berame sa City Disaster Risk Reduction and Management Office (CDRRMO) nga gikan ang maong mga basura sa mga nag-island hopping nga nagpataka og tambog sa ilang mga hugaw sa kadagatan.
Ang mga diver nga nisalmot sa kalihukan naggikan sa nagkadaiyang diving resorts sa dakbayan.
Gani, ang ubang volunteers gikan sa sa dakbayan sa Sugbo ug Talisay, matod ni Berame.
Nasuta ning mantalaan nga kapin sa 100 usab ang mga nisalmot nga mga tinun-an, kapulisan, ug kawani sa kagamhanan sa pagpanglimpyo sa mga baybayon sa coastal barangay sa Lapu-Lapu sama sa Pusok, Ibo, Mactan, Punta Engaño, Marigondon ug Maribago kagahapon. (JPP)