Lalaking taga Bohol nadakpan sa gilusad nga anti-illegal drug operation sa City Drug Enforcement Unit (CDEU) sa Cebu City Police Office alas 10:50 sa Dominggo sa gabii, Enero 15, 2023 sa Governor M. Cuenco Avenue, Barangay Kasambagan, dakbayan sa Sugbo.
Ang nasikop giila nga si Omar Lamdagan Ali, 28, taga probinsya sa Bohol apan natawo sa Jeddah, Saudi Arabia nga kasamtangan nga nagpuyo sa usa ka condominium sa Jose Maria Del Mar Street, Barangay Apas, dakbayan sa Sugbo.
Nakuha sa mga operatiba sa CDEU sa pagpangulo ni Police Major Dindo Alaras ang usa ka pakete sa gituohang shabu nga mobalor og P54,000, 27 ka mga kapsula sa gituohang ecstasy nga naila usab nga party drugs nga mokantidad og P45,900 ug gidudahang cocaine.
Matud ni Police Colonel Ireneo Dalogdog, hepe sa kapulisan sa dakbayan sa Sugbo, nga ilang na-monitor ang suspek human nasigpatan siya sa mga operatiba ning nagkaduol na ang Sinulog 2023.
Ang maong matang sa ilegal nga drugas sama sa shabu ug party drugs gamiton sa mga batan-on nga dunay ikasarang sa pagpalit.
Nasigpatan sa mga operatiba sa CDEU ang presensya ni Ali sa usa sa mga bar sa Governor M. Cuenco Avenue, habig sa Barangay Kasambagan nga nag party uban sa arangan nga mga batan-on.
Usa sa mga asset sa pulis ningduol sa suspek aron mopalit sa ilegal nga drugas ug sa dihang nagkasinabot na didto na ang binayranay sa gawas sa dakong imnanan sa maong lugar.
Sa dihang gidunol na ang maong mga ebidensya, gidiretso dayon siya og dakop sa mga pulis.
“Kining suspect didto ni nagatambay sa mga high end nga mga disco bar kay ang makapalit ra man ani ang well off nga mga tawo,” matud ni Dalogdog.
Si Alaras nagkanayon nga niadto pang 2020 nila gipangita si Ali human sa kamatayon sa usa ka langyaw nga nag check in sa usa ka dakong hotel sa Busay nga gituohang high sa ecstasy.
Si Ali ang gitudlo nga nag supply hinungdan nga na-overdose kini hangtod nga namatay.
Sukad niadto misibat na siya sa siyudad sa Sugbo ug nagtago-tago na sa lalawigan sa Bohol.
Ning nagkaduol ang Sinulog, nakadawat og impormasyon ang CDEU nga naa sa siyudad sa Sugbo si Ali ug kanunay kini nga mag estambay sa mga high end nga bar sa Kasambagan.
“Nawala man ni siya after adtong nahitabo sa Danish national nya ang among info didto nig Bohol. Siya man to ang nagbaligya sa party drugs nga human nakainom, wala na siya makahibalo unsay iyang buhaton kay nag overdose na man siya,” matud ni Alaras.
Sukad sa maong insidente, gipangita na siya sa kapulisan.Gani nabutang siya sa listahan sa Police Regional Office 7 (PRO) 7 ug laing ahensya sa gobyerno.