28 ka mga polis sa Talisay bansayon alang sa Swat

Sugdan sa sunod semana ning buwana ang pagbansay na sa 28 ka mga polis nga mahimong sakop sa Special Weapons and Tactics (Swat) sa dakbayan sa Talisay.

Matod ni Police Lieutenant Col. Randy Caballes, hepe sa Talisay City Police Station, nga 24 ka mga polis ang apil sa pagbansay sa Swat kon diin ang mga mohatag sa maong training mga sakop sa Swat gikan sa Camp Crame.

Duha ka buwan nga training, diin kini langkuban sa firearms proficiency, moresponde sa mga high risk situation, hostage taking ug apil sa ihatag nga pagbansay sa mga insidente batok sa pagpanulis.

“Kining atong SWAT personnel mao kini ang atong mga elite personnel team nga motubag kon dunay mga alarma nga gikinahanglan sila motabang sa atong mga polis,” matod ni Caballes.

Ang maong pagbansay sa 24 ka mga umaabot Swat personnel gigastuhan sa lokal nga kagamhanan og P3 milyunes, alang sa training ug mga gamit sa matag usa ka personnel.

Dugang ni Caballes nga gawas sa maong kantidad, ang Kagamhanan sa Talisay modugang og laing pundo alang sa ubang panginahalon sa pagbansay sa elite force.

Samtang si Talisay City Mayor Gerald Anthony “Samsam” Gullas Jr. nibutyag nga ang Talisay City angay nang makabaton og elite force tungod sa nagkadaghan nga magpapatigayon.

Alang kang Gullas nga molambo ang usa ka siyudad ug daghan ang mosulod nga negusyo kon mapadayon niini ang kalinaw sa palibot.

Ang hangyo lang ni Gullas sa pangu sa kapulisan nga aron man lang makabawi ang gobiyerno sa ilang gasto, unta molungtad sa lima ngadto sa pito ka tuig magpabilin kining unang batch sa Swat una i-assign sa laing lugar.

Ang hangyo ni Gullas giuyonan usab dayon ni P/Brig. Gen. Anthony Aberin, pangulo sa kapulisan sa Central Visayas, atol sa pagbisita niini.

Ang iya lang nga mosubay sa mas hustong pamaagi sa kasabutan tali sa Philippine National Police (PNP) ug Kagamhanan sa Dakbayan sa Talisay.