MISMONG si Cebu Governor Gwendolyn Garcia mao ang opisyal nga mibukas sa malampuson nga ikaduhang Cebu Federation of Beat Journalists (CFBJ) Shoot-For-A-Cause Dominggo, Septiyembre 11, 2022.
Ang maong fundraising event gipahigayon kini sa Front Site Gun Club, Inc., sa Barangay Tubod, lungsod sa Minglanilla.
Gawas kang Garcia, gipangulohan usab ang maong kalihokan ni Bureau of Jail Management and Penology (BJMP) 7 Jail Chief Superintendent Efren Nemeño; Police Regional Office (PRO) 7 Regional Director Police Brigadier General Roque Eduardo Vega nga girepresentar ni Regional Community Affairs & Development Division 7 Police Col. Atty. Antonito Cañete.
Ang maong kompetisyon gisalmutan sa nagkaiyang gun enthusiasts sa Sugbo.
Kini ang labing unang higayon nga ang Gobernadora sa lalawigan sa Sugbo mibambong sa kalihukan sa CFBJ isip pinasidunggang dinapit.
Matod sa Gobernador nga tungod kay pinangga niya ang journalists sa Sugbo wala siyay duha-duha sa pag tambong bisan sa adlaw sa pagpahuway unta niini nga adlawng Dominggo.
Mapasalamaton usab ang Presidente sa CFBJ Arnold Bustamante sa gihatag nga suporta sa gobernadora lakip na sa ubang mga nagpaluyo sama sa PRO 7, BJMP 7, lakip na ang Philippine Shooters and Match Officers Confederation, Inc. (PSMOC).
“Akong dakong pasalamat sa Gobernadora sa lalawigan sa Sugbo sa iyang hugot nga suporta sa CFBJ nga bisan sa iyang ka busy mihatag gayud siyag higayon sa pag tambong sa CFBJ Shoot-For-A-Cause. Ang kita sa maong kalihukan alang kini sa atong mga kaubanan sa media nga nanginahanglan sa atong panabang,” matod ni Bustamante.
Ang maong fund raising agi’g suporta sa CFBJ members lakip na ang health ug emergency assistance hilabi na nga karong buwana saulogon ang Cebu Press Freedom Week.
Present usab sa maong shooting competition ang nagkadaiyang opisyal ug miyembro sa CFBJ. (HBL)