TULO ka mga pasidungog ang nalangkat sa Dakbayan sa Lapu-Lapu sa gipahigayon nga Local Health Systems Awards 2020 sa Department of Health (DOH) Central Visayas Center for Health Development sa Biyernes, Disyembre 11, 2020.
Ginganlan nga kampiyon ang Lapu-Lapu ubos sa Highly Urbanized Cities Category nga adunay P250,000 nga cash prize. Nakuha usab sa Dakbayan ang unang luna sa kategoriya nga 2020 Performance Based Incentives Award for Barangay Health Workers nga adunay P300,000 cash prize.
Gipasidunggan usab ang Lapu-Lapu isip Top Performing LGUs on Increased LGU Budget Allocated to Health ubos gihapon sa Highly Urbanized Cities Category.
Ang Local Health Systems Awards 2020 sa DOH naghatag og pasidungog sa mga paningkamot, suporta, ug maayong lakang sa nagkalainlaing sektor sama sa LGUs, non-government organizations, academe, ug pribadong sektor alang sa pagkab-ot sa mga katuyoan sa kahimsog.
Gikalipay ni Mayor Junard “Ahong” Chan ang mga pasidungog nga nadawat sa dakbayan nga iyang gihulagway nga bunga sa kakugi sa mga kawani sa Lapu-Lapu.
“Tungod gayud ni sa atoang kakugi sa pagpangalagad, pagpanerbisyo sa atong mga kaigsuonang Oponganon. Pasalamat ta sa atong mga kawani sa City Health Office, atong mga doctors and nurses, nga nisanong gayud sila sa atoang hangyo, sa atong panawagan nga tagaan gayud nato og maayo nga serbisyo ang katawhan,” matod ni Chan.
Matod ni Chan nga mas daghan pa og mabuhat ang dakbayan sa sektor sa kahimsog.
“Mas daghan pa ta og mabuhat for our health because this is one of our top priorities. For next year, we have about additional eight ambulances. Mahimo ni siyang multipurpose ang paggamit nato sa sakyanan,” matod ni Chan.
Sa kasamtangan adunay mga ambulansya nga gipakatap sa mga clustered barangay sa dakbayan nga maoy moresponde panahon sa emerhensiya.
Gibutyag usab sa mayor nga ilang gipanglantawan nga magamit na ang second phase sa bag-ong building sa Lapu-Lapu City Hospital sunod tuig. (NDT)