Naka monitor og tulo ka barangays sa siyudad sa Sugbo ang Philippine Drug Enforcement Agency (PDEA) 7 nga adunay mga bata nga gigamit sa mga durugista pagpamaligya sa illegal nga drugas nga seryosong gipatutukan karon sa ilang ahensya uban ang Philippine National Police ug Dept. of Social Welfare and Development (DSWD) 7.
Ang tulo gilangkuban sa Mambaling, partikular na sa sitio Alaska, Ermita ug Duljo Fatima nga giila usab nga maoy labing apektadong dapit sa illegal nga drugas.
Matod ni Leia Alcantara, information officer sa PDEA-7, nga aduna na silay na-rescue nga mga bata atol sa ilang mga anti illegal drug operation ug giproseso dayon sa DSWD 7 tungod sa ilang linghod pa nga pangidaron.
Gikonsiderar kini sa ilang ahensya nga seryoso nga problema sanglit naglambigit man sa mga menor de edad.
Sila ang sentro sa programa sa gobyerno nga mao ang pagsalbar sa mga bata gikan sa illegal nga drugas. “When we say man gud nga involved ang mga minors, ato gyud na sila gi consider as a serious problem,” matod ni Alcantara.
Tungod niini, hugot ang pakig-alayon sa PDEA 7 ngadto sa DSWD ug PNP aron masulbad ang maong problema sa kabatan-onan sa dakbayan.
Adunay programa ang DSWD nga gitawag og Empowerment and Reaffirmation of Paternal Abilities kun Erpat diin ilang edukahon ang mga ginikanan kon unsa ka mahinungdanon ang papel sa ginikanan sa pagmatuto sa ilang mga anak nga dili madala sa paggamit sa illegal nga drugas.
Nabantayan sa pagtuon nga ang mga bata nga nabiyaan sa amahan ug napasagdan usab sa inahan mao kadtong nalambigit sa maong problema sa katilingban.
Gumikan niini, gitinguha nila nga moduaw sa kabarangayan aron molusad og seminar sa mga ginikanan aron dili mahimong libudsuroy ang ilang mga anak nga mahimong peligro alang kanila nga magamit sa bisan unsa nga matang sa krimen, usa ani ang illegal nga drugas.
“Ang mga papa, sila unta ang mogiya sa ilang family, but na observe na sa DSWD nga mura bag nahinay ang atoang mga papa. Naay mga papa nga nawala sa saktong dalan. In fact sila mismo nahimong biktima sa illegal nga drugas,” matod ni Alcantara.
SHABU
Samtang sa pagtuon sa Dangerous Drugs Board (DDB), ang marijuana ang nag-una nga gigamit nga illegal nga drugas sa mga drug addict tibuok Pilipinas kon basehan ang resulta sa ilang survey sa 2022 nga data.
Apan nipasabot si Alcantara nganong ang marijuana ang nag-una sa survey tungod sa kadaghan sa nasakmit nga punoan sa marijuana sa Cordillera region atol sa ilang mga operation.
Giapil usab sa survey sa matag pamilya nga dunay maka usa lang nga nakagamit og marijuana apan wala na nibalik sa dugay na kaayo nga panahon.
Dinhi sa Central Visayas, nag-una pa gihapon nga paliton sa mga drug user ang shabu tungod sa supply niini nga dali ra nga mapalit itandi sa marijuana nga gamay lang ang nananom.
Nagbase sila sa actual operations sa ilang ahensya ug kapulisan diin daghan silag nasakmit nga shabu itandi sa marijuana.