Tungod sa gihingusgan nga kampanya sa Police Regional Office (PRO 7) batok sa mga pinangita sa balaod, tulo ka most wanted persons nga magsuon ningtahan atol sa intelligence manhunt operation nga gilusad niadtong Pebrero 15, 2023.
Ang tulo ka magsuong mga Tababa sa dakbayan sa Lapu-Lapu naa na sa kustodiya sa kapulisan.
Sila gikiha og tulo ka mga ihap sa kasong lasciviousness conduct ubos sa Article 366 sa Revised Penal Code nga may kalambigitan sa Section 5 (B) Article III sa Republic Act 7610 kun Special Protection of Children Against Abuse, Exploitation and Discrimination Act.
Ang kaso gipasaka niadtong Pebrero 13, 2023 sa sala ni Judge Jose Alfonso Maliper Gomos sa Regional Trial Court (RTC) Family Court Branch 5 sa dakbayan sa Lapu-Lapu.
Alas 3:40 sa hapon sa Pebrero 15, 2023 ang Police station 4 sa Lapu-Lapu City Police Office ug Police Station 3 ning-serve sa warrant of arrest kang Elzid James Tababa human nitahan ug pagka alas 4:00 sa hapon sa maong adlaw, nitahan usab sa buhatan sa City Intelligence Unit sa LCPO silang Angelito Tababa ug Egbert Tababa.
Samtang laing most wanted person usab ang nadakpan sa kapulisan sa alas 5:30 sa hapon sa samang adlaw nga giila nga si Kirk Genson Potot, kinsa dunay kasong murder.
Ang mga personnel sa Police Station 3 sa dakbayan inabagan sa City Intelligence Unit ug Technical Support Company sa Regional Mobile Force Battalion 7 ni-serve sa warrant of arrest nga giluwatan sa korte.
Sa Negros Oriental, laing wanted person nadakpan sa personnel sa Criminal Investigation and Detection Group Negros Oriental Provincial Field Unit uban sa City Mobile Force Company.
Ang akusadao giila nga si Levi Malolot Pabalate, taga Barangay South Poblacion, lungsod sa Bacong, nag-atubang og kasong pagpayuhot sa ilegal nga drugas.
Tungod niini, gidayeg ni Police Brigadier General Jerry Bearis ang iyang mga personnel nga nakadakop sa mga wanted person aron dili na sila maka pamiktima pa.
“PRO 7 will continue to serve justice for the innocent victims, thus, I am directing all operational units on the ground to heighten the pursuit”, matud ni Bearis.
Magpadayon ang pagpangita sa kapulisan sa Central Visayas sa mga wanted persons nga dunay mga pending warrant of arrest.