Operasyon sa pagpangita sa tulo ka mga children in conflict with law (CICL) nga ning-ikyas sa Operation Second Chance (OSC) sa Miyerkules, Mayo 3, 2023, sa buntag, nagpadayon atol ning pagsuwat sa Huwebes, Mayo 4, 2023.
Matod ni Police Colonel Ireneo Dalogdog, hepe sa Cebu City Police Office (CCPO), ang iyang station commanders nagtinabangay aron makuha pagbalik ang maong minor offenders.
Nagpadayon usab ang ilang pakig-alayon sa mga ginikanan sa maong mga CICL aron mahangyo nga motahan kini sa kapulisan aron dili ni mosagol sa ubang badlungon sa katilingban nga makahatag na hinuon og peligro sa ilang kinabuhi.
Human nga giparelibuhan ni Cebu City Mayor Michael Rama ang tanang mga kawani sa OSC tungod sa sunodsunod nga pagpanglayas sa mga CICL, nagsugod na ang kapulisan sa pag-take over sa pasilidad.
Gibutyag ni Dalogdog nga gibahin sa Philippine National Police (PNP) ug Bureau of Jail Management and Penology (BJMP) ang pagdumala sa OSC.
Duna say mga sibilyan nga gikan sa Cebu City Hall nga motabang, sama sa pag-andam og pagkaon alang sa 97 ka mga CICL.
Walo ka mga personnel sa PNP ug walo usab sa BJMP ang magpuli-puli sa pagbantay sa OSC diin ang ilang trabaho mao ra ang pag-monitor sa mga lihok sa mga minor offender.
“Ang mag-assume sa security matters PNP personnel coming from Cebu City Mobile Force Company ug BJMP. So, adunay walo ka PNP personnel ug walo ka BJMP personnel nga naka-assigned didto,” dugang ni Dalogdog.
Giaprobahan usab sa Kagamhanan sa Dakbayan sa Sugbo ang rekomendasyon sa CCPO nga butangan og dugang steel gate ang OSC, lakip na CCTV camera ug alarm system.
Atol sa meeting nilang Cebu City Administrator Attorney Collin Rosell ug Konsehal Philip Zafra uban sa mga opisyal sa CCPO, gisaad nila nga sulod sa duha ka semana mapatuman na ang rekomendasyon aron dili masubli pa ang pag-ikyas sa mga CICL.