TULO ka mga tinun-an sa University of San Carlos (USC) sa Dakbayan sa Sugbo nasulod sa Top 10 sa Bar Exams nga gipagawas kagahapon.
Lakip niini mao ang top 2 nga si Christianne Mae Balili, kinsa nakakuha og grado nga 90.80%.
Samtang si Ivanne D’laureil Hisoler mao ang top 4 sa grado nga 89.55% ug si Rheland Servacio, kinsa mao ang 7th place sa grado nga 89%.
Laing duha ka mga tinun-an nga gradwar sa Sugbo usab ang nasulod sa top 20.
Lakip niini sila si Stephanie Claros sa University of San Jose-Recoletos sa 15th place (87.55%) ug si Ella Mae Mendoza sa University of Cebu nga anaa sa 17th place (87.35%).
Si Balili kinsa usa ka Certified Public Accountant (CPA) damgo na kaniadtong bata pa nga mamahimong abogado.
Usa sa inspirasyon niya kadtong nitaliwan na niya nga lola nga namatay sa unang Dominggo sa bar exam.
Wa usab siya makatambong sa lubong niini apan mao kadto ang iyang gihimo nga magpursige siya nga ma-top.
Gibutyag usab niya nga usa siya ka full time student dihang nikuha siya og abogasiya samtang usa usab siya ka working student.
Karon magpabilin siya sa kompaniya kon asa siya karon nagtrabaho.
Si USC College of Law Dean Joan Largo nibutyag usab nga 93% sa mga tinun-an nila nga nikuha sa bar ang pasado o 65 ka tinun-an sa 70.
Makatudlo usab ang tulo ka topnotchers og bisan kinsa nga gusto niining himuong scholar aron makapahimulos sa pribilihiyo sa ilang pag top.