SAMA sa shooting sa teleserye nga “Ang Probinsyano” ang nahitabong pagbanhig-patay sa duha ka guwardiya sa Cebu Provincial Detention and Rehabilitation Center (CPDRC) ug usa ka priso nga giingong drug lord karong buntag sa Unit 5 Oppra, Barangay Kalunasan, dakbayan sa Sugbo.
Mao kini ang paghulagway ni Si Basilla Anova, tag-iya sa sari-sari store nga nakasaksi sa pagpamanhig duol sa iyang tindahan.
“Akong nakit-an duha man to ka tawo uy. Nahadlok nako sa pagbutobuto kay sa una okay pa to kay nagtuo ko nga shooting lang sa ‘Ang Probinsyano’, sus, tinuod naman diay. Pagduol na atong usa kay gitiwasan mitago nako sa sulod sa balay,” matod ni Nova.
Ug patay dihadiha ang drayber nga si PG1 Joel Teves ug ang escort nga si PG1 Bernie Bayutas nga naa sa front seat sa van, samtang patay usab ang priso nga si Jeffreyfer Peregrino nga dunay kasong pagpayuhot sa ilegal nga drugas.
Natusaktusak sa mga bala ang driver side sa van lakip na ang windshield nga agi sa pag ambush sa mga biktima.
Matod ni Reynaldo Valmoria, warden sa CPDRC, nga niadtong Miyerkules sa hapon gidala si Peregrino sa piskaliya human gitumbok nga tag-iyasa mga pinaketeng shabu nga nasakmit atol sa greyhound operation sa Police Regional Office (PRO) 7.
Apan gi-schedule sa korte ang pag-file sa kaso karon nga hinungdanga gidala kini sa piskalya.
“Gahapon pa unta sila dalhon pero close na man (piskaliya) mao nga karon na lang sila gidala. Kanang inmate naa man gud nay kaso sa druga nya i-inquest unta ni karon pero gi-ambush na hinuon,” matod ni Valmoria.
Usa ka habalhabal driver nga nagdumili sa pagpahingalan nagkanayon nga magbiyahian sa Kalunasan nga ilang nasundan ang duha ka mga motorsiklo nga gisakyan sa upat ka mga lalake nga adunay gibitbit nga armas.
Pag-abot sa lugsungon nikalit og ni-u-turn sa dihang nasugatan nila ang van sa CPDRC ug pipila ka sigundo ang milabay, butobuto na sa armas ang ilang nadungog, sumala sa drayber sa habalhabal.
Human sa pagpamusil, dason sa drayber sa habalhabal, yano nga nanakay og gibalik ang duha ka mga nag-motorsiklo ug nipadagan kini paingon sa usa ka dapit sa Kalunasan.
Ang hepe sa Cebu City Police Office, Sr. Supt. Royina Garma, nimando sa mga imbestigador nga palawman ang imbestigasyon ang unsay motibo sa pagpamanhig.
Samtang doblehon sa CPDRC ang seguridad alang sa uban pang high-value target (HVT) nga mga piniriso human sa insidente sa pagbanhig-patay sa HVT inmate nga si Perigrino kauban ang duha ka mga jail guard.
Lakip sa mga HVT drug personality nga anaa karon sa CPDRC ang giilang number 1 drug lord sa probinsiya sa Sugbo nga si Alvaro Alvaro alyas Barok.
Matod ni CPDRC Warden Reynaldo Valmoria, makigtagbo siya sa iyang mga sakop nga mga jail guard ug kawani sa prisohan karong Sabado ug tukion ang mga precautionary ug security measures aron pagsiguro nga luwas ang mga HVT ug mga jail guard nga mag-escort kanila.
Tinguha sa warden nga matabangan sa kapulisan ang CPDRC pag-escort sa mga piniriso nga motambong sa ilang mga hearing sa korte tungod usab sa kakuwang sa mga jail guard.