GIHULAGWAY sa officer-in-charge sa Cebu City Police Office nga malinawon ug han-ay ang Penitential Walk with Mary ug Traslacion sayo sa kaadlawon hangtod sa Biyernes sa buntag.
Gibana-bana nga moabot ngadto sa kapin sa dul-an 300,000 ka mga debotong Katoliko ang ningsalmot sa prosesyon gikan sa Fuente Osmeña rotunda paingon sa Basilica Minore del Santo Niño.
Sukwahi sa Penitential Walk with Jesus niadtong Enero 10 nga giuwan, maayo ang panahon bisan bugnaw ang hangin.
Tungod sa kabaga sa panon sa mga deboto, ang tibuok Osmeña blvd. maoy giukopar sa ilang paglakaw sa duha ka kilometrong karsada.
Mga alas 3 pa lang sa kaadlawon, nagsugod na sa pagtapok sa rotunda sa Fuente ang mga deboto.
Daghan kanila ang sakripisyong nanagbitbit og mga imahen sa Santo Niño ug Birhen Maria.
Kahiusahan
Sa wali ni Fr. Aloysius Alojipan, kura paruko sa Archdiocese Shrine of our Lady of Guadalupe, siya niingon nga taliwa sa kalahian, nagkahiusa ang tanan sa pagtuo diha kang Sr. Santo Niño.
“Kita lain-lain og pinulongan, lainlain og kolor, lainlain og pamatasan, lainlaing og panghunahuna, apan nahiusa kita tungod ni Sr. Santo Niño nga nagtudlo nato nga usa ra ang atong amahan,” matod ni Alojipan.
Pagkahuman sa misa, gipahigayon ang Translacion diin giparada ang imahen sa Balaang Bata kauban ang imahen sa Birhen sa Guadalupe paingon sa National Shrine of Saint Joseph sa Dakbayan sa Mandaue.
Si Cebu City Mayor Edgardp Labella nitambong sa misa ug usa sa mga nikuyog sa motorcade padulong sa Mandaue City.
Gidili
Atol sa prosesyon, hugot nga gidid-an ni Soriano ang mga tawo nga mosaka sa mga skywalk sa Osmena boulevard nga bisan ang mga sakop sa media wa tugoti tungod sa kabalaka nga adunay madisgrasya.
Apan gitugtan ra usab hinuon ang mga tigbalita nga makakuhag hulagway sa ibabaw sa skywalk.
“Yes. That is part of the security plan kasi baka may mahulog magtulakan. Yan yung magtanong kanina kaya hinarang natin na makapanhik sa skywalk, delikado,” pasabot ni CCPO officer-in-charge Police Colonel Engelbert Soriano.
Dul-an usab sa duha ka libo ka mga pulis ang ipakatap sa kadalanan karong adlawa alang sa fluvial ug solemn procession nga himuon sa buntag ug hapon.
Wa nay signal sugod ganiHang alas 3 sa kaadlawon tumong ug tuyo nga malikay ang publiko sa posibling mahimong insidente nga hinimoan sa mga terorista.
Aron usab mahimong hilom ug balaan ang relIhiyusong kalihukan.
“Itong activities nato ay highly religious. And we would like to make it as solemn as possible. So, dapat peaceful ito at para maramdaman naman ng mga tao yung meaning ng ating procession,” sigun ni Soriano.
Awhag lang sa kapulisan sa publiko nga abagan sila sa pagbantay sa palibot sanglit iyang giangkon nga di nila malukop ang tibuok dakbayan sa Sugbo. (AYB)