HAPSAY ug malinawon ang Penitential Walk with Mary sa Biyernes sa kaadlawon, Enero 13, 2023 nga gisalmutan sa gibana-banang 350,000-400,000 ka mga debotong Katoliko.
Gihulagway sa kapulisan nga gidugok sa bagang duot sa mga deboto ang relihiyusong kalihukan karong tuiga, diin ang unom ka lanes sa Osmeña Boulevard giokupar na sa mga deboto nga nagprosesyon paingon sa Basilica Minore del Santo Niño.
Matod ni Police Colonel Ireneo Dalogdog, hepe sa kapulisan sa dakbayan sa Sugbo, nga base sa crowd estimate sa Cebu City Disaster Risk Reduction and Management Office ug Cebu City Police Office (CCPO), labing minus 350,000 ka mga tawo ang ningsalmot.
Gipaabot kini sa kapulisan, Kagamhanan sa Siyudad ug simbahan tungod kay karon pa mibalik ang linawas nga mga relihiyusong kalihukan sa Sinulog human sa duha ka tuig nga wala kini mahimo tungod sa pandemya.
“Kon i-compare nako ni sa Walk with Jesus, mas daghan karon base sa atong observation,” matod ni Dalogdog.
Way problema nga nasugatan ang kapulisan sa paghatag sa siguridad gikan sa Guadalupe church, diin nagsugod ang prosesyon sa imahen ni Birhen Maria takdo nga alas 3 sa kaadlawon paingon sa Fuente Osmeña rotunda.
Dugang ni Dalogdog nga sa ilang pag-abot sa sulod Basilica Minore del Santo Niño uban ni Cebu City Mayor Michael Rama, ilang nabantayan nga nagdasok na ang mga tawo nga peligro kon dunay gamay nga kasamok, magka estampede.
Gumikan niini, gihangyo sa kapulisan ug sa mayor ang kaparian sa Basilica nga ablihan ang mga pultahan sa luyo sa simbahan aron maoy agian sa mga tawo nga manggawas.
“Iyang gi suggest dili siya i-padlock. Kay ngano man kon i-padlock simbako kon dunay mga kagubot, ma panic ang mga tawo, dili sila makagawas kay na padlock man. Karon ang among gihimo amo nang gihangyo ang management sa Basilica dili lang sirad-an, nya naay pulis nga magbantay,” matod ni Dalogdog.
Gibutyag ni Dalogdog nga moabot sa 1,200 ka mga pulis ang ilang gipakatap, lakip na niini ang mga personnel sa Cebu City Transportation Office, CDRRMO ug mga force multiplier.
Wala sila makatala og bisan usa ka krimen gikan sa alas 2 sa kaadlawon hangtod nga natapos ang misa sa sulod sa Basilica pasado alas 5 sa buntag.
Samtang kapin sa 12,000 ka security personnel ang ipakatap sa solemn procession sa Sabado sa udto hangtod na sa gabii.
Matod ni Dalogdog nga ipakatap ang kapin sa 10,000 ka mga tinun-an sa nagkadaiyang mga tunghaan nga magsilbing crowd control.