Gidala sa tambalanan sa Biyernes sa hapon, Hunyo 23, ang 28 sa 36 ka mga menor de edad nga gisagop sa Cebu City Government pinaagi sa Sta. Rita Dormitory sa South Road Properties (SRP) human sila gituohang nangahilo sa pagkaon.
Base sa impormasyon nga nakuha sa Superbalita Cebu, ang mga bata nangahilo sa isda nga maoy ilang gipaniudto atol sa birthday nga gitambungan sa 77 ka mga tawo.
Sugod ala 1:24 sa hapon, ang mga ambulansya sa Cebu City Disaster Risk Reduction and Management Office nangabot sa SRP aron pagresponde human sila nakadawat sa tawag bahin sa insidente.
Moabot ngadto sa 10 ka mga ambulansya gi-dispatch sa CCDRRMO ug nimontar og medical station sa SRP nga maoy temporaryong niatiman sa mga pasyente, walo kanila wala na madala sa Cebu City Medical Center.