NIABOT sa 38 ka mga indibidwal ang natala sa Regional Epidemiology Surveillance Unit (RESU) sa Department of Health (DOH) 7 nga nabuthan o angol sa pabuto atol sa pagsugat sa Bag-ong Tuig.
Apan ang kaso sa pagsugat karong 2020, ubos og 24% itandi sa kaso sa pagsugat sa Bag-ong Tuig sa 2019. Niabot sa 50 ka mga kaso ang natala sa RESU 7 sa 2019.
Sa mga kaso sa 2020, usa ang naputlan og parte sa lawas samtang duha ang samdan sa saag nga bala.
Nag-una gihapon ang Cebu City nga daghang natala nga kaso sa nabuthan diin niabot og 12, gisundan sa dakbayan sa Mandaue nga adunay unom ka mga kaso, Talisay ug Lapu-Lapu City nga tag tulo ang mga kaso ug lungsod Minglanilla nga usa ka kaso ang natala.
Samtang natala ang insidente sa saag nga bala sa Mandaue City.
Sa mga nabuthan, anaa sa 1 ka tuig ang labing bata samgang 51-anyos ang labing hamtung.
Nabuthan
Nalandig sa tambalanan ang usa ka 5-anyos nga batang lalake sa isla Olango human mabuthi sa pinunit nga kwitis niadtong Bag-ong Tuig, Miyerkules, Enero 1.
Kini nahitabo sa Sitio Ibabao, Brgy Tingo, isla sa Olango, Dakbayan sa Lapu-Lapu alas 12:25 sa udto.
Ang biktima nailhang si Gabriel Dano Dagatan, kinsa nakaangkon og samad sa tuong bahin sa iyang mata human nga maigo sa pabutong kwitis.
Matod ni Police Staff Sergeant Otelio Ilustrisimo, desk officer sa Police Station 1 sa Lapu-Lapu City Police Office (LCPO) si Dagatan nakapunit og salin nga pabuto duol sa ilang balay nianang udto sa Enero 1.
Dihang nakakita ang biktima sa kwitis, iya kining giduwaan sa pagtuo nga di na mobuto o ba kaha nibuto na.
Naatol matod pa niadtong tungora nga adunay daob sa tugkaran sa ilang balay samtang siya nagduwa sa napunit nga pabuto.
Wa matuyo sa biktima nga iyang maitsa ang napunit nga kwitis sa daob hinungdan nga nibuto ug mitugpa sa iyang mata.
Daling gidala sa Sta. Rosa Community Hospital ang biktima human sa insidente
“Wala mahibaw-e pud og kinsa ang tag-iya sa nabilin nga pabuto kay wa may moangkon na. Minor ra gyud hinuon ang naangkon atong bata,” matod ni Ilustrisimo.