GIBUTYAG sa deputy officer sa Local Vaccination Operations Center sa Dakbayan sa Lapu-Lapu, James Sayson, nga adunay kapin sa 3,000 ka mga bakunado nga wala motunga sa ilang second dose sa bakuna batok sa coronavirus disease 2019 (Covid-19).
Kini gumikan sa nagkadaiyang mga rason sama sa ka-busy sa trabaho samtang ang uban giingong nanglarga sa ubang mga dapit.
Ang mga brand nga naturok sa maong mga bakunado mao ang Sinovac ug AstraZeneca.
Nunot niini, posibleng malangay pa ang pagkab-ot unya sa dakbayan nga makaabot og 50 porysento ang fully-vaccinated nga mga Oponganon.
Karong buwana, adunay kabahin sa 3,000 ka mga bakunado kinsang skedyul sa second dose molapas na og tulo ka buwan gumikan kay nabakunahan sila niadtong Hulyo ug Agosto.
USIK
Gipasabot ni Sayson nga kon ugaling molapas og tulo ka buwan ang usa ka indibidwal human maturoki sa first dose apan dili maturokan sa second dose, hayan mahulog na nga way bili unya ang iyang first dose.
Kon ugaling makadesider sila pagbalik nga magpaturok, hayan balik na usab kini isip first dose.
“Mao nay problema kay og dili sila motunga ana unya malapas na ang three months, back to zero gyud sila and we really need unta ani nga makab-ot nato ang herd immunity. Unya naa na ta sa 47 percent sa atong fully vaccinated unta,” matod ni Sayson.
SPUTNIK
Sa Dakbayan sa Sugbo, gipahibawo ni Dr. Jeffrey Ibones, pangulo sa Cebu City Health Department nga adunay kapin o kulang 200 ka mga vaccinee kinsa wala pa nagpabakuna sa ilang second dose hangtod karon human sila unang nabakunahan sa Sputnik V sa miaging mga buwan.
Matod ni Ibones nga wala pa sila masayod kon unsay hinungdan nganong wala sila makapabakuna sa ilang second dose dihang naabot kini niadtong hinapos sa Septiyembre.
Gitug-an sa pangulo sa CCHD nga hangtod karon, sila nagpaabot sa vaccinees nga mopatim-aw sa ilang vaccination sites aron makumpleto na ang ilang bakuna batok sa Covid-19 sanglit anaa ra gihapon sa ilang kustodiya ang second dose.