BUOT ni Gob. Hilario Davide III nga mapaspasan na ang katukuran sa ikatulong taytayan nga magsumpay sa mainland Cebu ngadto na sa isla sa Mactan.
Kini nunot usab sa gilantawan nga pagsulbong sa air ug land traffic, mugna sa pagbukas bag-o ug nindot nga Terminal 2 sa Mactan Cebu International Airport.
Sigun sa gobernador, angayang pangandaman ang mga hagit nga dala unya niining maong kalambuan, sama na lang sa traffic, ilabi na paingon ug gikan sa tugpanhanan.
Matod ni Gob. Davide, angayan lang nga mohimo ug paagi ang mga lokal nga kagamhanan sa Sugbo, aron matubag ang suliran sa land traffic aron dili usab matanggong kadtong mga dunay gi-apas nga flight sa tugpahanan ug kadtong mga magbakasyon dinhi.
Lakip si Davide sa mga opisyal nga gidapit pagsaksi sa inagurasyon sa MCIA Terminal 2 niadtong Huwebes.
Gihangop sa gobernador ang katukuran sa bag-ong airport terminal kay mas daghan na unya nga mga lokal ug langyaw nga turista nga mahimong makabisita sa Sugbo, pinaagi niini
Dugang ni Davide, dakong garbo alang sa mga SUgbuanon ang MCIA Terminal 2, ilabi na kay gi-showcase niini ang kultura sa Sugbo.
Si Presidente Rodrigo Duterte maoy nag-unang dinapit sa naasoy nga okasyon kinsa pulos pagdayeg ang iyang nabungat ug mapasigarbuhon sa maanindot nga airport nga gibuksan panahon sa iyang administrasyon. (AZLG)