PATAY na nga napalgan ang usa ka 4 anyos nga batang babaye nga gianod sa baha niadtong Huwebes pasado alas 4 sa hapon, Agusto 27, 2020, sa Sityo Managuksok, Barangay Bonbon, bukiran sa Siyudad sa Sugbo.
Si Andy Mari Maturan, 4, kauban sa iyang mga ginikanan ug higala, nanguhag materyales sa ilang himuong silhig nga ibaligya.
Si Bonbon Barangay Captain Eduardo Cabriana niingon nga pasado alas 5 na sa hapon nadawat nila ang impormasyon sa nahitabo kang Andy Mari.
Matod ni Cabriana nga kuyog sa bata ang iyang mga ginikanan nga sila si Dandy Maturan, 29, ug Rosario Lioberas, 39, ug ilang higala nga si Cliff Dacayana, 25.
Samtang nanubay sila sa sapa, ang tubig kalit nga misaka hinungdan nga dali silang nangadto sa daplin taliwa sa kusog nga pagbul-og sa tubig.
Si Andy Mari gituohang nabuhian sa iyang amahan nga nagkugos kaniya tungod sa kakusog sa sulog.
Ang lawas sa bata nabangalan sa may taytayan sa sityo Camarin sa nahisgutang barangay mga alas 5 pasado na sa hapon. (BBT)