Patay ang usa sa upat ka mga construction worker sa Barangay Poblacion, dakbayan sa Lapu-Lapu nga gikatahong nangahilo human makakaon og bangus alang sa panihapon niadtong Biyernes, Oktubre 28, 2022.
Si Police Major Ramil Dugan, hepe sa Lapu-Lapu City Police Station 3, niila sa namatay nga si Felix Genelazo, 35, taga dakbayan sa Carcar.
Si Dugan niingon nga ang 41-anyos nga si Virgilio Supas na-confine pa sa Lapu-Lapu City Hospital samtang duha sa ilang mga kauban sa trabaho ang nag-atiman sa ilang kaugalingong tambal aron mabuhi.
Sa inisyal nga imbestigasyon nasayran nga usa sa mga construction worker ang nipalit og usa ka kilo nga “spoiled” nga bangus nga nagkantidad og P30 gikan sa wa pa mailhing fish vendor gawas sa Poblacion Public Market mga alas 5 sa hapon Biyernes.
Matod ni Dugan nga ang mga construction worker nisugba sa gagmay nga mga isda ug gikaon kini alang sa panihapon.
Mga alas 8 sa gabii sa samang adlaw, ang mga biktima gikatahong nagsuka-suka, nagsakit sa tiyan ug gikalibanga sulod sa mga upat ka oras o hangtod sa alas 12 sa tungang gabii.
Nakahukom na lang sila nga magpatambal mga alas 2 sa kaadlawon sa Sabado, Oktubre 29, tungod kay grabe ang ilang kahimtang.
Hinuon ang hepe sa kapulisan niingon nga si Genelazo gideklarar nga dead on arrival sa attending physician.
Matod ni Dugan nga posibleng napalit nila ang maong isda nga naghuna-huna nga lab-as pa kini sanglit ngitngit na mga alas 5 sa hapon.
“Siguro tungod kay medyo gabi-gabi na tapos ano pa siguro wala silang pera alam natin na construction worker,” matod niya.
Si Dugan niingon nga ang mga biktima wala masayon kon duna bay laing posibleng tinubdan sa hilo kay gawas sa bangus, adunay “ginamos” sa lamesa.
Gitataw ni Dugan nga padayon ang imbestigasyon alang sa pag-ila ug pagkasikop sa namaligya sa isda.