GIDILING drugas nga nibalor og P295,000 nasakmit atol sa operasyon sa kapulisan sa Sitio Omega, Barangay Sawang Calero, dakbayan sa Sugbo niadtong Huwebes, alas 9:35 sa gabii.
Nasikop ang usa ka babae nga giila nga si Lyka Banilad Bayking, 32, ug residente sa Sitio Bato, Barangay Ermita, dakbayan sa Sugbo, kinsa naaktuhan sa paghupot og ilegal nga drugas.
Base sa nahipos nga impormasyon sa Cebu City Police Office (CCPO), ang tinugyanan sa Pasil Police Station nipahigayon og operasyon batok sa ilang subject nga si Bayking human sila nakadawat og reklamo sa usa ka concerned citizen kabahin sa pagpamaligya niini ug ginadiling druga sa nahisgutang dapit.
Nakuha sa posisyon ni Bayking ang lima ka medium sized nga pakete sa gituohang shabu ug usa ka dako nga pakete nga adunay sud nga illegal nga droga ug dali siyang giaresto sa mga kapulisan.
Nitimbang kini og 25 ka gramos ug base sa Dangerous Drugs Board (DDB) value gibana-banang mokabat ngadto sa kapin P200 mil.
Ang suspek nagtingkagol karon sa Pasil Police Station ug pasakaan og kasong kalapasan sa pagpamaligya og ilegal nga druga.
Sa lungsod sa Liloan, nasikop sa kapulisan ang tulo ka mga suspek human kini namaligya og ilegal nga drugas atol sa buy-bust operation sa Barangay San Vicente lungsod sa Lilo-an niadtong Huwebes sa gabii.
Ang mga suspek mao sila si Arnel "Aning" Villamor, 30, ulitawol; Geraldine Tocao, 49, dalaga; ug Mark Impas, 32, minyo.
Matud sa kapulisan nga gipangulohan ni Deputy Chief of Police, P/Insp.Jay Palcon nga mipahigayon sila og drug buy-bust operation pinaagi sa koordinasyon sa Philippine Drug Enforcement Agency (PDEA) 7 nga miresulta sa malampuson nga pagkadakop sa mga suspek.
Nakuha sa kapulisan gikan sa mga suspek ang mga gagmayng pakete sa gituohang shabu nga mokantidad og P28,3200.00 ug ang P1,900.00 nga buy-bust money.
Gibalhog karon ang mga suspek sa Lilo-an police station's detention facility ug gikatakdang pasakaan o kasong kalapasan sa R.A 9166 o mas nailhan nga Comprehensive Drugs Law of 2002. (Christine Joyce Secuya ug Clark Jude Suhot/ CNU Comm Interns)