Ang environmental networks niawhag sa Cebu City Government nga wagtangon ang pagtukod og waste-to-energy (WTE) facility ug ibalhin ngadto sa renewable energy atol sa ilang biking event karong Dominggo, Oktubre 2, 2022.
Mokabat sa 40 ka mga partisipante ang nagbisikleta gikan sa Plaza Independencia paingon sa Fuente Osmeña aron ipadayag ang ilang pagsupak sa bag-o lang giaprobahan nga WTE incineration facility ug ang gisugyot nga 300-megawatt liquefied natural gas power plant.
Ang mga sakop sa cause-oriented groups nga Asian People’s Movement on Debt and Development (APMDD), Philippine Movement for Climate Justice ug Sanlakas maoy nangulo sa kampanya batok sa giingong makadaot sa kinaiyahan nga mga proyekto.
Si Joselito Vasquez, campaign coordinator sa APMDD, nitug-an sa SunStar Cebu nga ilang hagiton sa korte ang joint-venture agreement alang sa WTE project.
Si Vasquez nagkanayon nga ila usab nga babagan ang aplikasyon sa project proponent alang sa environmental compliance certificate sa Department of Environment and Natural Resources (DENR).
Niadtong Septiyembre 22, gipirmahan ni Mayor Michael Rama ang notice to award ngadto sa New Sky Energy Philippines sa katukoran sa P4.8-bilyunes nga WTE facility nga mosunog sa basura aron makamugna og kuryente.
“Kini magduso kanato sa usa ka katalagman sa klima. Naa nata sa peligro and climate emergency and yet our officials are still planning to put up this type of dirty energy project,” matod ni Vasquez.