Mokabat sa 46 ka mga kandidato sa Oktubre 30 nga Barangay and Sangguniang Kabataan Elections (BSKE) ang nag-atubang sa posibleng disqualification cases sa Commission on Elections (Comelec) human gipasanginlan nga sayo nga nangampanya.
Ang datos nga gihatag sa Comelec nagpakita nga 46 ka mga kandidato sa BSKE nag-atubang og posibleng disqualification cases “upon initial assessment.”
Ang 46 nalakip sa 1,675 ka mga kandidato nga giisyuhan og show cause orders (SCOs) sa Comelec tungod sa premature campaigning.
Sa 1,675 ka mga kandidato nga adunay mga SCO, ang poll body miingon nga nakadawat kini og 221 ka tubag gikan sa mga kandidato.
Samtang 46 ang nag-atubang og posibleng disqualification cases, ang Comelec niingon nga aduna usay 91 ka bets sa SCOs ang nakalingkawas sa mga reklamo tungod sa kakuwang sa “factual basis”.
Gidili gihapon ang mga kalihokan sa eleksyon hangtod sa Oktubre 18 tungod kay ang BSKE campaign period magsugod lamang sa Oktubre 19.
Sa sunod semana, ang Comelec niingon nga sugdan na nila ang pagsang-at og pormal nga mga petisyon alang sa disqualification alang sa mga gipasanginlan nga ahat nga nangampanya.
Si Comelec Chairman George Garcia niingon nga tumong nila nga maresolba ang mga petition for disqualification sa dili pa ang Oktubre 30 nga piniliay. / HDT sa SunStar Philippines