Usa ka 5 anyos nga batang lalaki na missing samtang laing 22 ka mga tawo, apil na ang duha ka mga masuso, ang na rescue sa Philippine Coast Guard human ang bangka nga de motor nga ilang gisakyan natikyaob alas 7:30 sa gabii sa Dominggo, Enero 1, sa kalawran sa Brgy. Sangat, lungsod sa San Fernando, habagatang Sugbo.
Ang na-missing giilang si Rens Seguesabal. Si Romel Penatil, chief sa Municipal Disaster Risk Reduction and Management Office (MDRRMO) sa lungsod sa San Fernando nga nahinabi sa Superbalita Cebu, nagkanayon nga alas 8:40 sa gabii sa Dominggo gipahibalo sila sa mga sakop sa PCG nga dunay mga pasahero sa bangka nga na rescue nga gidala sa may Trigon San Fernando sa Brgy. Sangat.
Sumala pa niini nga ang mga sakop sa PCG maoy ning-rescue sa 22 ka mga pasahero, lakip sa mga bata.
Ang usa ka pamilya mangadto unta sa lungsod sa Calape, Bohol, alang sa birthday sa ilang kabanay sa Lunes dihang sila gihapak sa dagkong mga bawod.