Upat ka mga polis sa lungsod sa Borbon, amihanang Sugbo gipasakaan og kasong murder samtang ang ilang kauban nag-atubang kasong falsification sa National Bureau of Investigation (NBI 7).
Ang mga kaso nga gipasaka niadtong Hunyo 7, 2023 sa Office of the Ombudsman Visayas nagagumikan sa kamatayon sa usa ka lumolupyo sa lungsod nga gialarmahan ug gitubag sa kapulisan apan napatay kini niadtong Pebrero 1, 2022.
Ang mga polis nga gipangkasohan og murdergiilang sila si Police Staff Sergeants Aaron Salogaol ug Reffe Tejares, Patrolmen Gypsy Miro ug Jade Potane.
Gipasakaan usab og kaso si Police Master Seargent Lou Gelig Susvilla, deputy investigator sa lungsod may labot sa falsification by public officer ubos sa Article 171 sa Revised Penal Code ug grave misconduct human giingong nisuway pagtabon sa iyang mga kauban.
Kini may labot sa kamatayon sa usa ka 41-anyos nga si Michael Casas, taga Sitio Mahayahay, Brgy. Tabunan, Borbon.
Sa gihimong imbestigasyon sa NBI 7 pinangulohan ni Executive Officer for Administration Agapito Gierran, nga sa Pebrero 1, 2022 naukay ang mga silingan sa biktima human nagpabuto og armas.
Tungod sa kahadlok sa mga silingan, dali nilang gialarma sa kapulisan sa lungsod.
Ningresponde ang upat ka mga polis.
Matod ni Gierran nga sa pinanumpaang pamahayag sa mga polis, ilang gialegar nga sila gipabuthan ni Casas bisan sa ilang paghangyo sa pag-surrender.
Giingong wala mopatuo ug giingong gihulga pa sila.
Aron madepensahan ang ilang kaugalingon, ang team leader nga si Miro maoy giingong nipusil kang Casas gamit ang iyang M16 Armalite rifle.
Human sa hitabo, daling gidala sa Juan B. Diosdado Memorial Hospital sa Poblacion, lungsod sa Sogod ang biktima apan gideklarar nga patay na.
Apan ang istorya sa mga polis gisupak sa asawa sa biktima nga si Cristyl Casas ug mga saksi sa hitabo.
Sa pagsusi sa NBI 7, giingong namakak ug giabusaran sa kapulisan ang ilang gahom.
“It was in fact attended by treachery and abuse of superior strength with each named police officers sided each other in conspiracy with another in the perpetuation of the illegal acts,” matod sa NBI 7 pinaagi sa ilang giluwatang pamahayag.
Giingong gisuwayan usab pagtabon sa mga polis ang ilang gihimo pinaagi sa pag butangbutang og ebidensya.
“Worse, they attempted to cover the illegality of their conducts by planting evidence and fabricating facts tailored fit to extricate themselves for the legal mess...” dugang niini.
PRO 7 MOIMBESTIGAR
Ang Police Regional Office (PRO 7) mohimo og kaugalingon nga administrative investigation batok sa upat ka mga polis.
Matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, hepe sa kapulisan sa Central Visayas, nga ang tumong ug tuyo sa admin investigation mao ang paghatag og higayon nga makatubag ang upat ka mga polis sa pasangil batok kanila.
Kon dunay makita sa imbestigasyon, ilang sutaon kon unsa nga silot ang ipahamtang kanila, sama sa suspension sa trabaho o palagputon sa serbisyo apan mag-agad sa gibug-aton sa salaod nga ilang nahimo.
Andam usab ang PRO 7 nga mohatag sa mga dokumento ngadto sa Ombudsman aron makatabang sa imbestigasyon.
Apan nipasabot si Pelare, kinsa usa usab ka abogado, nga kon masuta sa imbestigasyon nga lehitimo ug nasubay sa Police Operational Procedure ang gibuhat sa upat, andam mobarog ang PRO 7 aron sila panalipdan sa kasong kriminal.
Bisan pa niini, nimando na si Aberin sa pagparelibo sa katungdanan sa upat aron dili makaimpluwensya sa imbestigasyon.