BUREAU of Protection (BFP-7) nagpa-augment og highly trained nga Special Rescue Unit (SRU) gikan sa rehiyon 6 ug rehiyon 8 aron sa pagtabang sa padayong gihimo nga search and rescue team sa landslide sa dakbayan sa Naga.
Gitug-an ni BFP-7 Regional Director Samuel Tadeo, ground commander sa gihimong search and rescue operation, nga dul-an sa 500 ka mga tawo, 130 niini ang gikan sa BFP 7, ang uban sa kapulisan, Bureau of Jail Management and Penology (BJMP), mga silingang lungsod ug siyudad nga disaster teams ug volunteers ang nagpuli-puli sa gihimong search and rescue.
Giangkon ni Tadeo nga nagkinahanglan sila og dugang highly trained SRU kay gikinahanglan usab mopahuway ang ilang mga SRU team sa rehiyon.
Ang BFP-7 adunay kapin sa 80 ka mga sakop sa SRU nga gipada na tanan sa dakbayan sa Naga.
Dugang 30 ka mga SRU personnel ang modugang.
Giangkon ni Tadeo nga nahimong dakong hagit nila karon sa SAR ang kanunay nga pag-ulan-ulan.
Samtang agig tubag sa panawagan nga gikinahanglan nga mobakwit kadtong mga nanagpuyo sa usa ka kilometro gikan sa nadahilian sa yuta, kagahapon padayon ang pagpamakwit sa mga maapektuhan, tinabangan sa kagamhanan sa dakbayan sa Naga ug sa Department of Public Works and Highways (DPWH) nga mga dumptruck.
Taliwa sa mapait nga panghitabo, gipakita usab nga buhi pa ang bayanihan ug ang pagtinabangay human nga gawas sa nag-abot-abot ang mga hinabang, libuan ka mga tinun-an ug pribadong indibidwal ang niboluntaryo alang sa himuong repacking sa mga bugas, canned goods, tubig, lakip na ang mga hygienic items, prutas, nga sinena, habol, banig ug uban pa. FDD