54 ka pamilya sa Cebu City pamugson sa pagpabakwit

Hulagway kuha ni Jenivy Famador
Hulagway kuha ni Jenivy Famador

Di mominos 54 ka mga pamilya ang target sa pugsanong pagbalhin ngadto sa mas luwas nga lugar human gideklarar sa Cebu City Disaster Risk Reduction Mitigation and Management Council sa Barangays Busay ug Bonbon gumikan sa kapeligro nga modahili ang yuta.

Kini human ang CCDRRMMC nideklara sa 2.5 ektaryas nga radius gikan sa sityo Garahe sa Barangay Busay nga naigo sa landslide ug lima ka ektarya sa sityo Gilagila sa Barangay Bonbon nga danger zones base sa ocular inspection uban sa Mines and Geosciences Bureau (MGB).

Si Atty. Gerry Carillo, special assistant to the mayor, nagkanayon nga 14 ka mga pamilya ang apektado sa Busay ug laing 40 sa Bonbon.

Sila kinahanglan na nga pabalhinon sa eskwelahan o sports complex nga luwas gikan sa posibleng pagdahili sa yuta.

Ang mga barangay tanod ug PNP stations nga duol sa dapit ug CCDRRMO personnel maoy gitahasan sa Office of the Mayor nga mopatuman sa maong deklarasyon.

Matod ni Carillo nga makabalik ra ang mga pamilya nga apektado sa higayon nga mogawas na ang soil test sa dapit ug masuta nga luwas pa kini puy-an sanglit gihulagway sa kanhi konsehal nga kon matipak ang yuta, landslide ang padulngan.

Si Mayor Michael Rama nagkanayon nga sa kasamtangan, ang kadtong lugar sa Busay diin nidahili ang yuta dili una pabalikan sa mga tawo.

Ang mga heavy equipment, mga sakyanan nga dunay unom ka ligid pataas dili una paagion sa sityo Garahe sanglit nabalaka si Rama nga masubli ang pag-irog sa yuta.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph