sa ka 59 anyos nga babaye ang nagpakitabang sa munisipyo sa lungsod sa Bilar sa Probinsiya sa Bohol sa Miyerkules sa hapon, Nobiyembre 23, 2022, human giingong gilugos sa usa ka lalaki sa kalibunan sa usa ka barangay sa lungsod.
Si Police Corporal Marga Hyacinth Quinar sa Women and Children Protection Desk (WCPD) sa Bilar nga nahinabi sa Superbalita Cebu nibutyag nga ang lola nga si Julia (tinuod nga ngan gipugngan), nidangop pasado alas 5:00 sa hapon sa naasoy nga adlaw.
Sa pamahayag ni Julia ngadto sa kapulisan nga pasado alas 3:00 sa hapon, samtang siya nagpaingon sa iyang basakan sa silingang barangay kon diin kini nagpuyo, kalit lang siya gibira sa usa ka lalaki nga nakapula ang t-shirt.
Sa unang imbestigasyon sa kapulisan, ang biktima niingon nga wala pa kamay-ong sa nawong sa nihilabot kaniya apan kon iyang makit-an, iyang mailhan.
Sa hot pursuit operation sa Bilar Police Station ug mga sakop sa WCPD, si Mario Hamoc, 31, silingan ra usab, giila sa biktima nga maoy nilugos kaniya dihang gipresentar sa kapulisan.
Matud ni Quinara nga atol sa pagdakop, ang suspek paingon na unta molakaw sa dapit diin giingong nahitabo ang lugos, apan siya naabtan ug napusasan.
Ang suspek, matud pa, nakainom apan nakurat siya dihang nakakita sa patrol car nga niabot sa dapit sa alas 6:00 sa gabii.