Walo ka mga personnel sa Special Operations Group 7 (SOU) sa PNP Drug Enforcement Group (PDEG 7) gipangrelibuhan sa katungdanan sa Camp Crame human unom kanila gipasakaan og duha ka mga kaso sa National Bureau of Investigation (NBI 7) tungod sa giingong pagdagit, pagtanggong ug pag-torture sa usa ka lalaki ug babaye niadtong hinapos sa Marso ning tuiga.
Matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, hepe sa Police Regional Office 7 (PRO 7), nga dili ubos sa pagdumala sa PRO 7 ang maong mga personnel, direkta sila sa Camp Crame.
Sa unom ka mga suspek, upat lang ang nailhan sa imbestigasyon sa National Bureau of Investigation (NBI 7) nga mao sila si Staff Sergeants Rey David Aumentado, Jemechiel Gemang, Rex Forrosuelo ug Marjun Milar.
Ang laing duha nga maoy nagsakay og motorsiklo wa pa mailhi hangtod ning pagsuwat samtang ang laing duha ka mga polis giapil sa pagrelibo bisan way labot kay duty sila atol sa hitabo.
Ang unom gipasakaan og mga kasong kidnappping and serious illegal detention ubos sa Article 267 sa Revised Penal Code as amended by Sec. 8 sa Republic Act 7659 ug grave misconduct nga kalapasan sa Republic Act 6713 kun Code of Conduct and Ethical Standards for Public Officials and Employees.
Ang insidente giingong nahitabo niadtong Marso 26, 2023, sa ala 1:00 sa kaadlawon samtang ang mga biktima nga silang Randolph Barliso Restauro 30, ug Gemalen Elorde, 26, pulos taga Velmiro Heights Subdivision Barangay Abono, lungsod sa Minglanilla, padulong mamalit sa usa ka convenience store.
Sa ilang pinanumpaang affidavit atubangan sa NBI 7, sila si Restauro ug Elorde niasoy nga nagsubay sa national highway sakay sa usa ka motorsiklo paingon sa convenience store sa Barangay Abono.
Pag-abot sa Tungkop National High School, kalit lang sila nga gibabagan sa duha ka wala mailhing mga lalaki nga luwan og motorsiklo nga niresulta sa ilang pagkalamba ug nakaangkon og mga pangos sa ilang kalawasan.
Niabot usab ang usa ka dark brown nga Toyota Innova ug nihunong sa ilang tungod ug dayong gawas sa duha ka wala mailhing mga lalaki ug ang upat nagtinabangay kanila sa pagpasakay.
‘KULATA’
Sigun sa mga biktima, nga samtang nagdagan sila paingon sa dakbayan sa Sugbo, gisumbag si Restauro sa polis nga naglingkod sa atubangan ug giingong niapil sab ang laing duha nga diha sa tupad niini.
“While said vehicle was travelling along the national highway towards the direction of Cebu City, the one sitting at the front started hitting Randolph at the face while both men flanking Randolph started hitting him at both sides,” asoy ni Elorde.
Nagsige kini og pangutana og “item” nga ilang nahibaw-an nga ang pasabot shabu.
Sa ilang pag-abot sa Linao, Talisay City, giingong gitaptapan ang ilang mga mata gamit ang masking tape. Apan di hugot ang taptap sa mga mata ni Elorde hinungdan nga dunay mga higayon nga siya nakakita sa mga dapit nga ilang giagian ug naklaro ang mga nawong sa upat ka mga polis.
Didto sila gidala sa usa ka building nga dunay sign nga “PSMBT” sa may R.R. Landon, dakbayan sa Sugbo ug sila gipasulod agi sa pultahan nga bildo.
Giingong nagpadayon ang pag torture kang Restauro samtang tinaptapan ang ilang mga mata.
“Still blindfolded were subsequently tortured physically, emotionally and mentally while inside said building for them to admit or produce the shabu, which the said men were looking for,” dugang sa mga biktima.
Sa pagsigeng hilak ug pakiluoy ni Restauro, matod sa mga biktima, nga ilang nakombinser ang mga suspek nga sila wa malambigit sa illegal drugs.
Niini, sila gipasakay og balik sa Toyota Innova ug gihatod sa dapit diin sila gi pick up alas 4:30 na sa buntag sa samang adlaw. Didto pa sa dapit ang ilang motorsiklo nga gisakyan.
Tungod niini, nidangop sila sa NBI aron pagpasaka og kaso samtang ang ahensiya nihimo dayon og imbestigasyon, sama sa pagkuha sa mga recording sa CCTV camera sa mga dapit nga nahitaboan ug giagian.
Dugang ni Pelare nga dili mo tolerate ang kadagkuan sa kapulisan sa gihimo sa maong mga personnel.
“The standing instruction of our new Chief PNP, ang atong operation must always be done in accord with the policy. Sa palisiya diha ang atong police operation magsubay ug kahibalo na ta nga ang PNP dili gyud mo tolerate sa mga ingon ani. Ug kami mismo sa PNP will conduct og thorough and fair investigation. After sa investigation nga makita nato nga ang atong police sad-an gyud, we will not hesitate to impose the penalty nga appropriate para nila,” matod ni Pelare.