CALBIGA, Samar - Unom ka mga sundawo ang patay samtang siyam ang samdan sa pag ambush sa mga rebeldeng New People’s Army (NPA), alas 3:45 sa kadlawon, Martes, Abril 23, 2019.
Matod ni Lt. Karen Cadano sa 46 Infantry Battalion, kinsa emosyonal nga nahinabi sa Superbalita Cebu, nagpahigayon og patrolya sa lugar ang iyang mga kauban isip parte sa ilang community support program.
Atol sa pagpatrolya, usa ka buto ang nasinati sa tropa nga gipangulohan ni Sergeant Guilbert Benito.
Nisunod dayon ang pinusilay tali sa mga sundawo ug mga rebelde.
Sa engkwentro, patay ang unom ka mga sundawo, apan ang 46th IB nihangyo nga di lang usa ipublikar ang ngan sa mga namatay kay unahon pagpahibawo ang ilang tagsa ka pamilya.
Gawas sa unom, siyam usab ka mga sundawo ang samdan nga mao sila si Benito; Corporal (Cpl) Mamalo; Cpl. Vigilia; Private First Class (Pfc) Magoncia; Pfc. Paster; Pfc. Frigillana; Pfc. Salonga; Pfc. Español ug Pfc. Garcia.
Ang lugar nga nahitaboan anaa kapin sa 10 ka kilometros gikan sa town proper diin nakabase ang pipila ka mga sakop sa 46th IB.
Dali nga gialerto ang duol nga police stations ug Philippine Army detachments gumikan sa nagpadayon nga operasyon.
Ang mga samaran gipangdala sa duol nga tambalanan ug gidala ngadto dayon sa tambalanan sa Dakbayan sa Tacloban.
Sa paghimo ning balita, padayon pa ang pagkuha og impormasyon sa militar maylabot sa maong insidente.
Bata nabuthan
Samtang alas 9:45 sa buntag, Abril 17, 2019, usa ka bata nga lalake ang nakalas sa pagbuto sa usa ka improvised explosive device (IED) sa Barangay San Miguel, Las Navas, Northern Samar.
Ang biktima giilang mao si Armando Remolde, 9.
Gisuwayan sa pagsalbar sa kasundalohan ang biktima apan pakyas kini.
Gituohan nga ang IED iya sa mga rebeldeng NPA nga gitumong alang unta sa mga sundawo nga magpatrolya.
Gikondenar sa militar ang binuhatan sa NPA sa pagdamay niini sa mga sibilyan hilabi na sa bata.