PALOMPON, Leyte -- Unom ka mananagat ang nasikop sa kapulisan sa Palompon, Leyte uban sa Human Ecological Sector (HES) sa Local Government Unit Palompon, alas 5 sa buntag, Sabado, Marso 23.
Kini human nigamit og motorized compressor samtang nanagat sa may west side portion sa Kalanggaman Island.
Ang mga nasikop mao sila si Eddie Montebon, 56; Romulo Oliva, 58; Willi Jaron, 40; Stephen Sablas, 28; Alvin Jaron, 21 ug Jameson Jaron, 34, pulos taga Barangay Gairan, Bogo, Cebu.
Ang kapulisan pinangulohan ni Senior Police Officer SPO4 Danilo Lubiano ug Eduardo Quiamco sa HES ang nihimo og seabourne patrol hinungdan sa pagkasikop sa unom.
Nasakmit sa kapulisan ang pump boat, usa ka makina nga 13hp loncin, tulo ka flashlight, upat ka improvised spear gun, upat ka pares nga improvised fins, duha ka rolyo sa hose, usa ka compressor ug tulo ka styrofoam.
Gidala sa istasyon sa kapulisan ang unom kinsa mag-atubang og kasong kalapasan sa Republic Act 8550 o Fishiries Code of Philippines. (JKDP)