Unom ang nadakpan sa duha ka managlahi nga mga buy-bust sa mga awtoridad niadtong Miyerkules, Hulyo 22, 2020 sa managlahing mga dapit sa Dakbayan sa Sugbo.
Ang buy-bust hiniusang gihimo sa Philippine Drug Enforcement Agency (PDEA) ug Police Drug Enforcement Group-Special Operations Unit (PDEG-SOU-5) Visayas nga niresulta sa pagkasikop sa unom ka mga tawo, usa kanila menor de edad.
Unang operation gipahigayon sa Barangay Kinasang-an mga alas 3:15 sa Miyerkules sa hapon.
Si Liea Alcantara, tigpamaba sa PDEA-7, niila sa suspek nga si Nandino Arriesgado, 42, nagpuyo sa nahisgutang dapit, usa ka high value individual.
Nasakmit gikan kang Arriesgado ang 50 gramos sa gituohang shabu nga dunay Dangerous Drugs Board (DDB) value nga P340,000.
Nianang mga alas 7 sa gabii sa samang adlaw, lima ka mga tawo ang nasikop sa usa ka drug den sa may Barangay Carreta, usa niini 15 anyos nga lalake nga giingong maoy suguon kon mopalit og illegal drugs.
Si IA III Ivy Claire Oledan sa PDEA-7, nangu sa anti illegal drugs operation, niila sa mga suspek nga sila si Edimar Joshua Kangkee, 23, taga Sityo Crossing; John Erick Dabalucos, 28l Carlo Igot, 25; ug Paquito Detaño Jr., ug James, 15.
Matod ni Oledan nga si Kangkee ang ilang target nga maoy nagmintinar sa drug den nga gibungkag sa nagronda.
Si James nga nahinabi sa Superbalita Cebu niangkon nga siya ang sugoon sa mga mopalit kang Kangkee bugti sa P100 nga sohol matag sugo.
Giangkon usab ni James nga dunay panahon nga mogamit siya kon hagaron ni Kangkee.
Nasakmit ang 11 gramos sa gituohang shabu nga balor og P74,000.
Ang mga suspek naa sa buhatan sa PDEA 7 gitanggong samtang gihikay ang kasong isang-at batok kanila.
Si James gidala sa Operation Second Chance. (BBT)