Usa ka senior citizen naangol human napusilan sa iyang silingan tungod sa away sa yuta, alas 6:50 sa gabii sa Martes, Mayo 2, 2023, sa Purok Adelfa, Barangay Batad, lungsod sa San Remigio.
Ang biktima giilang si Renato Piamonte Domecillo, 60, minyo, nagpuyo sa nahisgutang lugar, pabiling giatiman sa doktor human nakaangkon og samad pinusilan sa lawas.
Nitahan sa Miyerkules sa kaadlawon, Mayo 3, 2023, ang suspek nga giilang si Roy Oplas, 37, ulitawo, construction worker, taga Sitio Banica, Barangay Banban, dakbayan sa Bogo.
Gitahan sab niya ang .38 kalibreng revolver nga giingong gigamit sa pagpusil.
Si Police Master Sgt. Leomar Ticaolaza, imbestigador sa San Remigio Police Station, niingon nga hubog si Oplas ug ang biktima nga nag-abot sa usa ka tindahan ug nagkalalis.
Ang anak sa biktima nibutyag nga nasuko ang suspek ngadto sa iyang amahan tungod kay nipasangil nga nisobra ang ilang pagpangangkon sa yuta.
Si Police Major Wendell Abellana, hepe sa San Remigio Police Station, nagkanayon nga si Oplas nialigar nga giataki siya sa biktima hinungdan nga iyang napusilan isip depensa.
Kasong frustrated homicide ang giandam sa kapulisan batok sa suspek. (GPL)